8 Fellesfråsegn frå EU og NATO om Den europeiske forsvars- og tryggingspolitikken (ESDP) 16. desember 2002
Den europeiske unionen og Det nordatlantiske forsvarssambandet
helser velkommen den strategiske partnarskapen som er etablert mellom Den europeiske unionen og NATO på krisehandteringsområdet, med grunnlag i felles verdiar, udeleleg tryggleik og eit fast forsett om å løyse utfordringane i det nye hundreåret,
helser velkommen den viktige rolla til NATO innan krisehandtering og konfliktførebygging, og stadfester at NATO no som før er grunnmuren i det kollektive forsvaret av medlemmene i organisasjonen,
helser velkommen den europeiske tryggings- og forsvarspolitikken (ESDP), som skal utvide det spekteret av verkemiddel som unionen alt har til disposisjon for å handtere kriser og førebyggje konfliktar og såleis støtte opp om den felles utanriks- og tryggingspolitikken, med ei evne til å gjennomføre EU-leidde krisehandteringsoperasjonar, også militære operasjonar der NATO som heilskap ikkje er involvert,
stadfester at ei sterkare europeisk rolle vil vere med på å vitalisere Alliansen, særleg på krisehandteringsområdet,
stadfester sitt faste forsett om å styrkje sine evner,
og erklærer at tilhøvet mellom Den europeiske unionen og NATO skal vere grunnlagt på følgjande prinsipp:
partnarskap for å sikre at krisehandteringsaktivitetane i dei to organisasjonane er gjensidig forsterkande, samtidig som ein erkjenner at Den europeiske unionen og NATO er organisasjonar med kvar si eigenart,
effektive og gjensidige ordningar for konsultasjon, dialog, samarbeid og innsyn,
likeverd og tilbørleg respekt for Den europeiske unionen og NATO sine interesser og frie rett til å gjere eigne vedtak,
respekt for interessene til medlemsstatane i Den europeiske unionen og NATO,
respekt for prinsippa i FN-charteret, som ligg til grunn for Traktat om Den europeiske unionen og Washington-traktaten, for å sikre eitt av dei uunnverlege fundamenta for eit stabilt euroatlantisk tryggingsmiljø grunnlagt på forpliktande vilje til å løyse tvistar på fredeleg vis, der ikkje noko land kan skremme eller tvinge noko anna ved å true eller bruke makt, og på respekt for rettar og plikter etter inngådde avtalar og på å avstå frå å handle einsidig,
konsekvent, tydeleg og gjensidig forsterkande utvikling av dei militære evnekrava som er felles for dei to organisasjonane.
For å oppnå dette
arbeider Den europeiske unionen for å sikre at europeiske NATO-medlemmer utanfor EU kan delta i størst mogleg grad i ESDP idet dei aktuelle Nice-ordningane blir sette ut i livet, som skissert i brevet frå EUs høge representant av 13. desember 2002,
støttar NATO ESDP i samsvar med dei relevante vedtaka frå toppmøtet i Washington, og gjev Den europeiske unionen, mellom anna og særskilt, garantert tilgang til NATOs planleggingsevner, slik det går fram av NATO-rådsvedtaka av 13. desember 2002,
har begge organisasjonane erkjent behovet for ordningar som sikrar konsekvent, tydeleg og gjensidig forsterkande utvikling av evnekrava som er felles for dei to organisasjonane, på grunnlag av ei open innstilling.