5 KONKLUSJONAR OG TILRÅDING

Etter Regjeringa sitt syn er det viktig for Noreg å ta del i det europeiske samarbeidet på likestillingsområdet. Noreg har vore eit føregangsland på dette området, med lange tradisjonar i arbeidet for likestilling mellom kvinner og menn. Vi har såleis mykje å kome med. Vi ligg mellom anna høgt på statistikken når det gjeld kvinnerepresentasjon i folkevalde organ på lokalt, regionalt og nasjonalt nivå. Men Noreg vil òg kunne gjere seg nytte av impulsar frå andre land i Europa, særleg fordi målsetjingane og prioriteringane i handlingsprogrammet er i samsvar med norsk politikk og norske prioriteringar. EU har vore ein pådrivar for likestilling for kvinner i medlemsstatane. Deltakinga i likestillingsprogrammet vil kunne vere ein måte å knyte oss til dei andre europeiske landa på og styrkje samarbeidet over landegrensene.