– Vi held fram med løyvingar i verdstoppen til universiteta, høgskulane og forskingsmiljøa. Neste år prioriterer vi strategiske investeringar i forsking, tungrekning og nye studieplassar som det er særleg behov for. Det skal gi oss kunnskapen og arbeidskrafta vi treng framover, seier forskings- og høgare utdanningsminister Sigrun Aasland (Ap).

I 2026 vil regjeringa bruke 51,3 milliardar kroner på forsking og utvikling. Det er ein realauke på 1,8 prosent sidan 2025. Regjeringa vil gi universiteta og høgskulane ei rammeløyving på 48,2 milliardar kroner. Det er ein liten realauke, på 0,1 prosent. 

Kraftig satsing på toppforsking og teknologi

– Regjeringa er i gang med ei offensiv satsing på forsking og kunnskap. Vi prioriterer teknologi, internasjonalt samarbeid, forsvar og infrastruktur. Det treng vi for å ruste Noreg for framtida og utvikle næringslivet, velferda og eit trygt samfunn, seier Aasland.

Prioriterer nye studieplassar i kvanteteknologi og helse

– Auka mangel på arbeidskraft og behov for omstilling av norsk økonomi gjer at vi må prioritere utdanningstilbod som svarer best mogleg på behova i samfunnet og arbeidslivet. Satsinga på kvanteteknologi både her i Noreg og internasjonalt gjer at denne kompetansen vil bli endå meir etterspurt framover. Derfor vil vi opprette 100 nye studieplassar i kvanteteknologi, seier Aasland.

Regjeringa legg også pengar på bordet til fleire studieplassar i helsefag: 155 studieplassar i sjukepleie, 60 studieplassar til profesjonsstudiet i psykologi og 20 studieplassar i medisin. I tillegg kjem utvida kapasitet på arbeidsplassbasert barnehagelærarutdanning (ABLU), audiografutdanninga og fleksibel utdanning i Øst-Finnmark.

– Vi held fram arbeidet med å utdanne fleire legar i Noreg, og vi møter det store behovet mange norske kommunar har for fleire psykologar, sjukepleiarar og audiografar. Det er viktig for helsa og velferda til folk i heile landet, seier Aasland.

Universitet og høgskular

Regjeringa foreslår 48,2 milliardar kroner i rammeløyving til universiteta og høgskulane i 2026. Det er ein auke på 57,6 millionar kroner utover prisjusteringa, eller 0,1 prosent.

Utvikling i løyving på kap. 260 til universitet og høgskular dei siste 10 åra i milliardar 2026-kroner:

Grafen viser utviklingen i tildeling på kap. 260 til universiteter og høyskoler de ti siste årene. Fra 45,8 milliarder i 2016 til 48,2 milliarder i 2026.

Samla forsking og utvikling (FoU)

Forsking og utviklingsarbeid som er finansiert av det offentlege, skjer ved mellom anna universitet og høgskular, forskingsinstitutt, helseføretak og i næringslivet. Av heile budsjettforslaget for 2026 bereknar regjeringa at til saman 51,3 milliardar kronar går til FoU. Det er ein nominell auke på om lag 2,6 milliardar kroner frå 2025-budsjettet, og inneber ein realauke på 1,8 prosent. Medrekna Skattefunn-ordninga, er FoU-innsatsen på om lag 55,2 milliardar kroner. FoU som del av BNP blir berekna til 0,95 prosent ekskludert Skattefunn, og 1,02 prosent inkludert Skattefunn.

Viktige satsingar i 2026

  • 380 millionar kroner over to år til nasjonal infrastruktur for tungrekning.
  • 132 millionar kroner årleg i fem år, med moglegheit for tre års forlenging, for å styrke forsking på forsvarsevne, tryggleik og beredskap.
  • 1 mrd. kroner fordelt på ti år til Polhavet 2050, i snitt 100 mill. kroner årleg.
  • 150 millionar kroner årleg i fem år for ytterlegare styrking av forskinga på kvanteteknologi.
  • 300 millionar kroner over tre år til styrkt rekruttering av internasjonale toppforskarar.
  • 259,8 millionar kroner i husleigekompensasjon til Universitetet i Oslo ved innflytting i nytt bygg for livsvitskap og 78 millionar kroner for å styrke UiO si satsing på livsvitskap.
  • 50 millionar kroner fordelt likt til NTNU og Universitetet i Oslo til framifrå forsking på nye teknologiar som skal auke konkurransekrafta i norsk næringsliv.
  • 65 millionar kroner til å gjennomføre forprosjekt for nytt universitetsmuseum i Tromsø.
  • 37,5 millionar kroner for at UiO kan overta tannteknikarutdanninga frå OsloMet, styrke kvaliteten og fagmiljøet og sikre framtidig utdanning.
  • 7 millionar kroner til UiT for å greie ut organiseringa av eit nasjonalt kompetansesenter om fornorskingspolitikk og urett.
  • 5 millionar kroner til Nasjonalt senter for realfagsrekruttering ved NTNU, for å motivere elevar til å velje realfags- og teknologiutdanning.

  • 100 nye studieplassar i kvanteteknologi: 50 kvar til NTNU og Universitetet i Oslo.
  • 60 studieplassar til profesjonsstudiet i psykologi: 30 kvar til Universitetet i Agder og Universitetet i Stavanger.
  • 155 studieplassar i sjukepleie:
    • 75 til Lovisenberg diakonale høgskole
    • 50 til OsloMet – storbyuniversitetet
    • 30 til VID vitenskapelige høgskole
  • 20 studieplassar i medisin til Universitetet i Bergen (Vestlandslegen, Helse Fonna HF)
  • 225 studieplassar i arbeidsplassbasert barnehagelærarutdanning (finansiert av midlar flytta frå kap. 231 Barnehagar):
    • 60 til OsloMet – storbyuniversitetet
    • 60 til Universitetet i Søraust-Noreg
    • 40 til NLA Høgskolen
    • 30 til Universitetet i Stavanger
    • 15 til Universitetet i Innlandet
    • 15 til Nord universitet
    • 5 til Universitetet i Agder
  • 10 millionar kroner til å utvide kapasiteten på audiografutdanninga (NTNU)
  • 6 millionar kroner til fleksibel og desentralisert utdanning i Aust-Finnmark (Universitetet i Tromsø – Noregs arktiske universitet).