– Dette gjer vi for å svekkje Russlands evne til å vidareføre krigen mot Ukraina, seier utanriksminister Espen Barth Eide. 

Avgjerda byggjer på liknande tiltak som EU har innført. Både den tryggingspolitiske situasjonen og forholdet vårt til partnarane våre i Europa tilseier at Noreg står saman med EU om tiltak retta mot Russland og Belarus. Noreg har, med enkelte nasjonale tilpassingar, slutta seg til EUs sanksjonar mot Russland sidan 2014. 

Den nye forskrifta inneber at det for landbruksvarer frå Russland og Belarus skal betalast ei tollavgift på 50 prosent av tollverdien i tillegg til ordinær tollavgift. For gjødselvarer frå Russland og Belarus skal det betalast ei tollavgift på 6,5 prosent av tollverdien, i tillegg til 5 000 kroner per tonn. Varer som er omfatta av forskrifta, skal ikkje få rett til redusert tollavgift etter tollavgiftslova. 

Importen frå Russland og Belarus utgjorde, ifølgje Statistisk sentralbyrå, høvesvis 2,8 milliardar kroner og 2,6 milliardar kroner i 2025. Dei største varegruppene frå Russland i 2025 var fisk (hovudsakleg torsk, 39 prosent), fiskefôr (35 prosent) og raps- og rybsolje til fiskefôr (19,5 prosent). Frå Belarus utgjorde raps- og rybsolje til fiskefôr (88 prosent) og linolje til fiskefôr (10,9 prosent) hovuddelen av importen. 

Auka tollavgift på desse varene vil først og fremst påverke norsk oppdrettsnæring, ettersom det i hovudsak er fiskefôr og fôringrediensar (vegetabilske oljar) som i dag blir importerte frå Russland og Belarus.