3 Endringar på statsbudsjettet for 2026
Kap. 2315 (Nytt) Lønsregulering for arbeidstakarar i det statlege tariffområdet
Post 01 (Ny) Driftsutgifter
Samla bruttoutgifter ved lønsreguleringa for arbeidstakarar i det statlege tariffområdet per 1. mai 2026, er for perioden 1. mai – 31. desember 2026 rekna ut til 4 464 mill. kroner. Løyvingsoverslaget byggjer på berekna lønsmasse i det statlege tariffområdet per 1. januar 2026.
Overslaget omfattar alle tilsette som får si løn fastsett etter hovudtariffavtalane i staten. Meirutgifter som følgje av auka satsar for overtid og arbeidsgivaravgift er medrekna. Vidare er meirutgifter til pensjonspremiebetaling medrekna.
Meirutgifter i samband med lønsreguleringane for forvaltingsorgan med særskilde fullmakter og forvaltingsbedrifter, blir dekte innanfor budsjetta til verksemdene.
Verksemder med arbeidstakarar som får løn administrativt fastsett i kontrakt, må sjølve dekkje meirutgiftene av lønsregulering innanfor eksisterande budsjett.
Etter fråtrekk av det ovanfor nemnde, er meirutgiftene rekna til 3 348 mill. kroner. Etter vanleg praksis blir slike meirutgifter dekte ved at det blir ført opp løyving under kap. 2315 Lønsregulering for arbeidstakarar i det statlege tariffområdet, post 01 Driftsutgifter, som Finansdepartementet blir gitt fullmakt til å fordele, jf. forslag til romartalsvedtak V.
Kap. 1560 Tariffavtalte avsetningar mv.
Post 21 Særskilde driftsutgifter, kan overførast, kan nyttast under post 70
For perioden 1. mai 2026 – 30. april 2028 blir det avsett til saman 4 mill. kroner til kompetanseutvikling. Avsetninga skal i hovudsak gå til felles tiltak i regi av dei sentrale partane. Departementet foreslår at 1 mill. kroner av avsetninga blir løyvd for 2026, 2 mill. kroner blir foreslått løyvd på statsbudsjettet for 2027 og 1 mill. kroner på statsbudsjettet for 2028.
Post 70 Kompetanseutvikling mv., kan overførast, kan nyttast under post 21
For perioden 1. mai 2026 – 30. april 2028 blir det avsett til saman 27 mill. kroner til kompetanseutvikling. Avsetninga skal i hovudsak gå til å styrke kompetanseutvikling i verksemdene. Departementet foreslår at 19 mill. kroner av avsetninga blir løyvd for 2026, at 7 mill. kroner blir foreslått løyvd på statsbudsjettet for 2027 og 1 mill. kroner på statsbudsjettet for 2028.
Post 71 Opplæring og utvikling av tillitsvalde
Løyvinga dekker tilskot til opplæringstiltak for tillitsvalde til organisasjonane i staten innanfor mellom anna organisasjons- og tillitsvaldarbeid, miljø og vernearbeid, sjukefråvær, medråderett, personalpolitiske spørsmål, omstilling, effektivisering og samfunnsøkonomi m.m. Retningslinjer for opplærings- og utviklingstiltak er fastsett i eigen særavtale mellom staten og hovudsamanslutningane (særavtale om OU-midlar).
Det blir foreslått at løyvinga blir auka med om lag 17,7 mill. kroner. Summen er rekna ut med bakgrunn i talet på årsverk og lønsmasse i statleg tariffområde per 1. oktober 2025. Bidraget frå arbeidstakarane til OU-midlane blir auka med 100 kroner til 500 kroner, som blir trekt i brutto årsløn pr. arbeidstakar pr. år.
Kap. 2309 Tilfeldige utgifter
Post 01 Driftsutgifter
Det er avsett midlar til dekning av meirutgiftene ved lønsregulering for arbeidstakarar i det statlege tariffområdet m.m. Løyvinga på posten vil bli redusert i samband med proposisjonen om ny saldering av statsbudsjettet 2026 til hausten.