3 Andre saker
Oppfølging av oppmodingsvedtak
Redningshelikopterbasen i Tromsø
Vedtak nr. 983, 25. mai 2021
«Stortinget ber regjeringen starte nødvendige forberedelser som sikrer at Forsvaret overtar som operatør av redningshelikopterbasen i Tromsø når kontrakten med sivil operatør går ut.»
Dokumenta som ligg til grunn for vedtaket, er Prop. 85 S (2020–2021) og Innst. 393 S (2020–2021) frå justiskomiteen.
Hovudredningssentralen (HRS) har levert ei utgreiing om konsekvensane ved å gjennomføre vedtaket. Utgreiinga presenterer to alternativ som begge kan levere tilfredsstillande redningshelikoptertenester, men som har ulike fordelar og ulemper: eitt alternativ med vidareføring av sivil operatør, og eitt der Forsvaret overtek som operatør av basen i Tromsø når kontrakten med den sivile operatøren går ut.
Det blir no gjennomført ei ekstern kvalitetssikring av dei to alternativa som er presenterte i utgreiinga. Alternativet med vidareføring av sivil operatør inneber lågare kostnadar enn alternativet der Forsvaret overtek, hovudsakleg som følgje av lågare investeringskostnadar. Dersom Forsvaret blir operatør med AW101 SAR Queen-helikopter, vil dette gje større rekkjevidde og større løftekapasitet samanlikna med det ein sivil operatør kan tilby. Dette vil sikre lik standard som dei andre basane og vil kunne styrkje totalberedskapen. Dette vil vere gjenstand for kvalitetssikring. Forsvaret som operatør vil kunne nytte helikoptera i større grad ved krisar eller krig.
Staten har ein opsjon på kjøp av nye redningshelikopter. Det er gitt ein åpning av leverandøren for å utsette frist på opsjonen i kontrakten på inntil to månader. Så raskt som råd er etter at kvalitetssikringa er ferdig vil regjeringa leggje fram ein proposisjon for Stortinget med forslag til val av framtidig løysing for drifta av redningshelikopterbasen i Tromsø.
Etablering av ungdomseiningar
I nysalderinga for 2024 og statsbudsjettet for 2025 er det løyvd 11 mill. kroner på kap. 430, post 45 til investeringar i samband med etableringa av ei Ungdomseining sørvest på Evje og 60 mill. kroner til utbygging ved Ungdomseining aust på Eidsvoll. Departementet foreslår at midla sjåast i samanheng og kan brukast til begge prosjekta.
Retting av feil i samla inntekter på Svalbardbudsjettet
Ved behandlinga av Svalbardbudsjettet 2025 i Utanriks- og forsvarskomiteen, jf. Innst. 17 S (2024–2025), vart det vedteke feil beløp i inntektskapittel 3035 Tilskudd fra statsbudsjettet, post 50 Tilskudd. På posten vart det vedteke ei inntekt på 477 000 000 kroner. Riktig beløp skal vere 477 050 000 kroner, noko som samsvarar med Stortinget sitt vedtak på statsbudsjettet kap. 480 Svalbard, post 50 Tilskudd, jf. Blå bok.
Vidare skal dei samla inntektene på Svalbardbudsjettet også aukast med 50 000 kroner, frå 697 288 500 kroner til 697 338 500 kroner. Desse presiseringane er nødvendige for utarbeidinga av statsrekneskapen og svalbardrekneskapen for 2025. Dei riktige beløpa er lagt til grunn for omtale i Prop. 1 S (2025–2026).
Bakgrunnen for endringane på 50 000 kroner er gjort greie for i Prop. 1 S Tillegg 2, kapittel 2, under omtale av kap. 480 Svalbardbudsjettet, post 50 Tilskudd.
Endringar internt på Svalbardbudsjettet
Departementet foreslår å auke løyvinga på Svalbardbudsjettet kap. 0005 Sysselmeisteren med 1,5 mill. kroner mot ein tilsvarande reduksjon på 1,5 mill. kroner på Svalbardbudsjettet kap. 0006 Sysselmeisterens transportteneste. Sysselmeisteren har i 2025 hatt ekstra utgifter, m.a. knytt til høgnivåbesøk i samband med at det er gått 100 år sidan Svalbard vart innlemma i kongeriket. I desse samanhengane har det påløpt ekstra utgifter, mellom anna knytt til vakthald.
Avtale mellom Den europeiske union og Norge om overføring av passasjerlisteopplysninger (PNR-opplysninger)
Forslaget til løyving på kap. 440 Politiet, post 01 Driftsutgifter, dekkjer mellom anna utgifter til sakshandsaming i politiet i tilknyting til «Avtale mellom Den europeiske union og kongeriket Norge om overføring av passasjerlisteopplysninger (pnr-opplysninger) for å forebygge, avdekke, etterforske og rettsforfølge terrorhandlinger og alvorlig kriminalitet» (PNR-avtalen) inngått 14. oktober 2025. Dei økonomiske og administrative kostnadane ved avtalen er avgrensa, og kan handterast innanfor det noverande løyvingsnivået på budsjettposten.