1 Samandrag

Under programområde 02 Utanriksforvaltning blir det gjort framlegg om å redusere løyvingane med 2,8 mill. kroner. Reduksjonen har i hovudsak samanheng med at Noregs pliktige bidrag til internasjonale organisasjonar vart lågare enn venta. Samstundes aukar løyvingane under EØS-finansieringsordningane med 70 mill. kroner samla.

Under programområde 03 Internasjonal bistand tilseier nye overslag at flyktningutgiftene i Noreg som kan godkjennast som internasjonal bistand (ODA), blir lågare i år enn det som vart lagt til grunn i revidert nasjonalbudsjett for 2026. Det blir gjort framlegg om å redusere løyvinga med 580,2 mill. kroner. Av dette blir 522,2 mill. kroner omprioritert til annan bistand under Utanriksdepartementet, medan 58 mill. kroner blir omprioritert til Klima- og skoginitiativet under Klima- og miljødepartementet.

I tillegg er det også andre reduksjonar i anslag på tilsaman 67,6 mill. kroner på Utanriksdepartementet sitt bistandsbudsjett. Samla utgjer dette 589,8 mill. kroner som blir omprioritert til annan bistand på Utanriksdepartementet sitt område. Regjeringa prioriterer auka støtte til Palestina, styrkt innsats for rettskamp og innsats for å redde liv og lindre naud i fleire delar av verda.

Bistandsbudsjettet i 2026 utgjer etter dette om lag 56,8 mrd. kroner, som svarar til 1 pst. av anslaget for bruttonasjonalinntekt (BNI) lagt til grunn for 2026-budsjettet.