Noreg på møte med EUs finansministrar
Nyheit | Dato: 20.09.2025 | Finansdepartementet
Noreg blei for andre gong i år invitert som eit av få gjesteland på EUs finansministermøte (ECOFIN) for å diskutere korleis Europa skal handtere ein verden med meir usikkerheit.
Statssekretær Sissel Kruse Larsen (Ap) i Finansdepartementet deltok laurdag på vegner av Noreg og tok til orde for å verne om det indre europeiske marknaden og styrkje det europeiske forsvarssamarbeidet.
På møtet diskuterte finansministrane korleis den europeiske økonomien påverkas av geopolitisk uro, med auka stormaktrivalisering, høgare tollsatsar og fleire konfliktar.
– For Noreg er det særleg viktig å halde tett kontakt og bevare det gode samarbeidet med våre viktigaste handelspartnarar i Europa. Vi er ein sentral aktør i europeiske initiativ for styrkt forsvars- og handelssamarbeid, seier Kruse Larsen.
Halda orden i norsk økonomi
Statssekretær Kruse Larsen tok til orde for at det viktigaste land kan gjere i møte med ein meir usikker verden, er å halda orden i eigen økonomi. På den måten har vi betre føresetnader til å handtere usikkerheit i verda rundt oss.
– Tiltak for auka konkurransekraft, meir lønsame investeringar og forsking og innovasjon kan auke vekstevna i den europeiske økonomien. Noreg støttar dette viktige arbeidet, og vi er positive til europeiske initiativ for å forenkle byråkrati og regelverk, seier Kruse Larsen.
Det er samstundes viktig å finne ein god balanse mellom krav på den eine sida og forenklingar for næringslivet på den andre. Noreg advarte difor på møtet mot ensidig å deregulere finanssektoren.
Møter med viktige handelspartnarar
På møtet var det særleg viktig for statssekretær Kruse Larsen å snakke med våre viktigaste handelspartnarar i Europa. Ho hadde mellom anna samtaler med Frankrike, Sverige, Tyskland og Austerrike. Eit sentralt tema var EUs varsla vernetiltak på ferrolegeringar.
– Når EU vurderer tiltak for å verne sitt indre marknad, er det viktig å hugse at denne marknaden består av 30 land – inkludert EØS/EFTA-landa. Noreg, Island og Liechtenstein har i meir enn tre tiår bidratt til verdiskaping og utvikling i den indre marknaden. Våre verdikjeder er tett samanvevd med Europas industri, og barrierar høyrer ikkje heime på innsida av vårt felles marknad. Derfor er det avgjerande at eventuelle tiltak ikkje rammar oss, seier Kruse Larsen.
Ho understreka at norske bedrifter følgjer dei same reglane for statsstøtte, konkurranse og grøn omstilling som industrien i EU-landa. Tiltaka som no vurderas, kan likevel få store konsekvensar for norsk industri, arbeidsplassar og verdiskaping.