Forord

Noreg har ei rik nærings- og industrihistorie som har spelt ei sentral rolle i samfunnsutviklinga. Vi har eit felles ansvar for å ta vare på kulturmiljøa våre, og bevaringsstrategien skal leggje til rette for dette.

Store industrielle anlegg, små særeigne næringar, bevegelege kulturminne og infrastruktur er alle element som har bidrege til økonomisk vekst, teknologisk framgang og etablering av komplekse samfunnsstrukturar. Samtidig har industrialiseringa ført med seg store utfordringar, som miljøforureining, sosiale ulikskapar og overforbruk av naturressursar. Denne samansette industrihistoria har ført til eit stort mangfald av kulturmiljø knytt til næring og industri.

Handverk, kunnskap og tradisjonar gir liv til kulturarven. Bevaringsstrategien for kulturmiljø i næring og industri skal sikre at vi bruker og tek vare på heile breidda av dei historiske spora, anlegga og landskapa.

Gjennom denne strategien ønskjer vi å løfte kulturmiljø i næring og industri og bidra med tiltak der behova er størst.

Målet er å bevare og samtidig finne smarte langsiktige løysingar som gir nytt liv til kulturmiljø, og som skaper verdiar for framtida.

Andreas Bjelland Eriksen

Klima- og miljøminister