2 BAKGRUNN FOR ENDRINGSFORSLAGA

Kvalitetsregelverket for fisk og fiskevarer blei som ei følgje av EØS-avtalen harmonisert med EU sine tilsvarande reglar. Sentralt i denne samanhengen er Rådsdirektiv 91/493/EØF av 22 juli 1991 om fastsetjing av helsereglar ved produksjon og omsetjing av fiskeprodukt. For å implementere EØS-avtalen på dette punktet er det påkravd med endringar i lov om kvalitetskontroll med fisk og fiskevarer o.a.

Verkeområdet etter lov om kvalitetskontroll med fisk og fiskevarer o.a. § 1 samsvarer ikkje fullt ut med verkeområdet for Rådsdirektiv 91/493/EØF slik det kjem til uttrykk i direktivet artikkel 2 punkt 1. Første ledd i § 1 er som følgjer: «Med fisk og fiskevarer er i denne loven meint fisk, sild, skaldyr og blautdyr med biprodukt og varer der fisk, sild, skaldyr eller blautdyr er det einast eller ein stor del av råstoffet. Loven gjeld òg fisk og fiskevarer med utanlandsk opphav». Ifølgje direktivet artikkel 2 punkt 1 er fiskeriprodukt «alle saltvass- eller ferskvassdyr eller delar av slike dyr, medrekna deira rogn og melke, unntatt sjøpattedyr, froskar og sjødyr som er omfatta av anna fellesskapslovgjevning». Det er difor påkravd at § 1 blir harmonisert ytterlegare med direktivet.

Lov om kvalitetskontroll med fisk og fiskevarer o.a. § 6 inneheld mellom anna føresegner om retten til tilgjenge for norske kontrollorgan i verksemder og transportmiddel som blir omfatta av lova. Med grunnlag i Rådsdirektiv 91/493/EØF artikkel 8 utfører sakkunnige frå EU-Kommisjonen kontroll med at direktivet sine krav blir oppfylt i medlemsstatane i EU. I norske verksemder som blir omfatta av direktivet skal Overvakingsorganet til EFTA (ESA), i samarbeid med norske styresmakter, gjennomføre tilsvarande kontroll for å sikre at krava som blir stilt i direktivet blir følgt opp. Det er difor påkravd å gje heimel i lov om kvalitetskontroll for fisk og fiskevarer o.a. slik at utanlandske inspektørar skal kunne delta i inspeksjonar m.v. når dette er føresett i internasjonale bindande avtaler som Noreg har slutta seg til.

Forslaget om å ta bort § 6 første ledd tredje og fjerde setning har bakgrunn i at mellombels lov av 30 juni 1955 om regulering av og kontroll med produksjon, omsetjing og utførsle av fisk og fiskevarer blei oppheva ved lov 27 april 1990 nr 9 om regulering av eksporten av fisk og fiskevarer. Eksportutvala som føresegna viser til er lagt ned. Føresegnene er difor ikkje lenger aktuelle.