5 Andre saker
Oppfølging av oppmodingsvedtak
Høyring av forskrifter om nasjonal tryggleik i mineralloven
Ved handsaminga av Representantforslag om et statlig mineralselskap, jf. Dokument 8:148 S (2025–2026), Innst. 376 S (2025–2026), gjorde Stortinget 2. juni 2026 vedtak nr. 848:
«Stortinget ber regjeringen i løpet av 2026 sende på høring de varslede forskriftene om nasjonal sikkerhet i mineralloven.»
I Prop. 1 S (2026–2027) for Nærings- og fiskeridepartementet blei det opplyst at regjeringa var i gong med å følgje opp vedtaket.
I den nye minerallova, som tredde i kraft 1. juli i år, er det teke inn ei føresegn i § 1-9 som gir Kongen heimel til å fastsetje forskrift om tiltak som er nødvendige for å vareta omsynet til nasjonal tryggleik knytt til mineralverksemd og forvaltning av mineralressursar.
Departementet tek sikte på å sende eit forslag på høyring innan utgangen av 2026. Eventuelle regelverksendringar kan først fastsetjast etter at høyringa er avslutta og høyringsinnspela er vurderte.
Ny ordning for lågutsleppsteknologi i trafikklyssystemet
Ved handsaminga av Fremtidens havbruk – Bærekraftig vekst og mat til verden, jf. Meld. St. 24 (2024–2025), Innst. 525 S (2024–2025), gjorde Stortinget 12. juni 2025 vedtak nr. 1054:
«Stortinget ber regjeringen fremme forslag om en ordning som også omfatter lavutslippsløsninger, når det foreligger tilstrekkelig datagrunnlag og teknologisk verifikasjon – herunder automatisert lusetelling. Dette forutsetter utredning og høring, og ny ordning skal senest tre i kraft i løpet av 2026. Ordningen skal erstatte dagens unntaksregel i trafikklyssystemet og innrettes slik at effekt på lusereduksjon og styrke på insentiv henger sammen.»
I Prop. 1 S (2026–2027) for Nærings- og fiskeridepartementet opplyste regjeringa at ho ville komme tilbake til Stortinget på eigna måte.
Departementet tek sikte på å sende eit forslag til ordning på høyring innan utgangen av 2026. I samsvar med Stortinget si oppmoding forutsett ei ordning for lågutslepp at det ligg føre tilstrekkeleg datagrunnlag og teknologisk verifikasjon, deriblant automatisk luseteljing. Desse kriteria ligg ikkje føre enno. Forslaget vil difor vere avgrensa til å gjelde nullutslepp. Eventuelle regelverksendringar kan først fastsetjast etter at høyringa er avslutta og høyringsinnspela er vurderte.