Prop. 66 L (2025–2026)

Justis- og beredskapsdepartementet foreslår i proposisjonen endringar i utleveringslova § 18 som vil bidra til ei meir formålstenleg behandling i Justis- og beredskapsdepartementet av saker om utlevering av lovbrytarar, og med det òg ei meir effektiv kriminalitetsnedkjemping på tvers av landegrensene. Forslaga, som er ei delvis oppfølging av NOU 2022: 15 Utleverings- og arrestordreloven, vil sikre ei raskare handtering av utleveringssaker utan at det går på kostnad av rettstryggleiken til den ettersøkte. Samstundes blir den samla varetektstida redusert. Dette er ein fordel for den ettersøkte, som unngår langvarig uvisse om utfallet av utleveringskravet. Forslaga vil dessutan klargjere ansvarsfordelinga mellom påtalemakta, domstolen og departementet og dermed sørge for ein meir effektiv utleveringsprosess utan unødvendig dobbeltarbeid.