Brukarstyrt personleg assistanse
Artikkel | Sist oppdatert: 04.11.2025 | Helse- og omsorgsdepartementet
Brukarstyrt personleg assistanse (BPA) er ein alternativ måte å organisere kommunale helse- og omsorgstenester på, som mellom anna inkluderer personleg assistanse som praktisk bistand og støttekontakt.
Etter pasient- og brukarrettslova § 2-1d (lovdata.no) har personar under 67 år med langvarig og stort behov for personleg assistanse etter helse- og omsorgstenestelova (lovdata.no) rett til å få slike tenester organisert som brukarstyrt personleg assistanse.
Retten omfattar også personar over 67 år som før dei fylte 67 år har fått innvilga brukarstyrt personleg assistanse. Vidare omfattar retten avlastningstiltak for personar med foreldreansvar for heimebuande born under 18 år med nedsett funksjonsevne.
Stadfestinga av denne retten er ein del av regjeringa sitt arbeid med å følge opp intensjonen i FN-konvensjonen om rettane til menneske med nedsett funksjonsevne.
Rundskriv og lovarbeid
Helse- og omsorgsdepartementet gav i 2015 ut eit rundskriv om stadfesting av rett til brukarstyrt personleg assistanse (BPA).
Rundskrivet gir ei nærare skildring av føresegna sitt omfang, innhald og særleg aktuelle problemstillingar.
Føresegna er basert på :
- Prop. 86 L (2013–2014). Endringar i pasient- og brukarrettslova (rett til brukarstyrt personleg assistanse)
- Innst. 294 L (2013–2014). Innstilling fra helse- og omsorgskomiteen om endringar i pasient- og brukarrettslova (rett til brukarstyrt personleg assistanse) (stortinget.no)
- Prop. 93 L (2019–2020). Endringar i pasient- og brukerrettslova (utvida rett til brukarstyrt personleg assistanse)
- Innst. 316 L (2019–2020). Innstilling fra helse- og omsorgskomiteen om Endringer i pasient- og brukerrettslova (utvida rett til brukarstyrt personleg assistanse) (stortinget.no)
Kommunane har etter helse- og omsorgstenestelova plikt til å ha tilbod om BPA, også for personar som fell utanfor føresegna.
To utval
Hausten 2019 blei det sett ned eit utval som gjekk gjennom BPA-ordninga i si heilskap (BPA-utvalet). BPA-utvalet leverte si utgreiing i desember 2021.
Utvalet var delt i synet på grunnleggande spørsmål knytt til framtidig organisering og regulering av ordninga, mellom anna spørsmålet om kva forvaltingsnivå som bør ha ansvaret for ordninga og kvar den framtidige ordninga bør regulerast.
NOU 2021:11 «Selvstyrt er velstyrt» har gitt eit godt kunnskapsgrunnlag om BPA. Under høyringa av utvalet si innstilling, og i det vidare arbeidet, har det likevel kome opp problemstillingar det er ønskeleg å få utgreidd vidare.
Regjeringa satt derfor i oktober 2025 ned eit ekspertutval som skal vurdere korleis BPA kan innrettast for å bidra til likestilling, likeverd og samfunnsdeltaking. Utvalet skal levere si utgreiing innan 15. desember 2026.