Med den nye lova (lovdata.no) er retten kvinner har til sjølvbestemt abort utvida frå utgangen av 12. svangerskapsveke til utgangen av 18. svangerskapsveke.

Retten til sjølvbestemt abort omfattar både abortar der heile svangerskapet blir avbrote, og abortar der talet på foster blir redusert (fosterreduksjon).

Abortnemnder

Det er etablert nye og forbetra abortnemnder som behandlar krav om abort etter utgangen av 18. svangerskapsveke. Dei nye abortnemndene har tre medlemmer.

Leiaren for nemndene skal vere lege, eitt medlem skal vere jurist, og eitt medlem skal ha helse- eller sosialfagleg kompetanse. Fleirtalet i nemndene skal vere kvinner. Avslag på krav om abort blir sende vidare til behandling i Nasjonal klagenemnd for abort (Abortklagenemnda), viss ikkje den gravide trekker kravet.

enemnda skal ha fem medlemmer. Leiaren for nemnda skal vere lege, minst eitt av dei andre medlemmene skal vere lege, og eitt medlem skal vere jurist. Både abortnemndene og Abortklagenemnda er fagleg uavhengige og kan ikkje instruerast om innhaldet i avgjerder eller saksbehandling i enkeltsaker eller generelt om lovforståing, anvending av retten, skjønnsutøving eller saksbehandling.

Rettleiing og oppfølgingssamtalar

Gravide som vurderer abort, har etter den nye lova rett til rettleiing i valet mellom å fullføre svangerskapet eller å ta abort, og informasjon om relevante offentlege velferdsordningar og tenestetilbod.

Alle som har valt å ta abort, har rett til inntil to oppfølgingssamtalar i den kommunale helse- og omsorgstenesta eller i spesialisthelsetenesta.

Retten gjeld personar som har gjennomgått ein provosert abort, inkludert ein fosterreduksjon. Retten gjeld ikkje etter spontanabortar.

Andre endringar

I den nye lova er det vedtatt endringar i reglane for abort for barn og vaksne utan samtykkekompetanse. Retten barn har til å bli høyrde, og involveringa frå foreldra er styrkt.

Det same gjeld retten til sjølvbestemming for personar med funksjonsnedsetting. I den nye lova er det klargjort at abortar ikkje kan gjennomførast dersom den gravide motset seg det. Unntak kan berre gjerast dersom den gravide risikerer vesentleg helseskade.

Retten helsepersonell har til å reservere seg mot å utføre eller assistere ved abortar av samvitsgrunnar, er vidareført med den nye lova.