Alternativ behandling er regulert i alternativ behandlingslova (lovdata.no) og i forskrifter som er gjevne i medhald av lova.

Definisjon av alternativ behandling

I lovens § 3 er alternativ behandling definert som «helserelatert behandling som utøves utenfor helse- og omsorgstjenesten, og som ikke utøves av autorisert helsepersonell.​ Behandling som utøves i helse- og omsorgstjenesten eller av autorisert helsepersonell,​ omfattes likevel av begrepet alternativ behandling når det brukes metoder som i all vesentlighet anvendes utenfor helse- og omsorgstjenesten.»

Fridom og avgrensingar

Regelverket skal gi pasientane fridom når det gjeld val av behandlingsform, og samstundes setje avgrensingar av omsyn til pasienttryggleik og forbrukarvern.

Det er til dømes gitt reglar som stiller krav til korleis utøvarar av alternativ behandling kan marknadsføre seg. Dette er regulert i § 8 i lova og i forskrift om marknadsføring av alternativ behandling av sjukdom (lovdata.no). På dette området blir det gjennomført tilsyn.

Frivillig registerordning

Det er oppretta ei frivillig registerordning der utøvarar av alternativ behandling kan registrere seg. Ordninga er regulert i forskrift om registrering av alternative behandlarar (lovdata.no).

Ordninga skal medverke til betre ivaretaking av pasienttryggleik og forbrukarrettar for dei som oppsøkjer ein registrert alternativ behandlar, og bidra til seriøsitet og forretningsmessig ordna forhold blant utøvarar av alternativ behandling, jf. § 1 i forskrifta. I forskrifta blir det stilt krav både til utøvarorganisasjonen og til den enkelte utøvar for å kunne bli godkjend og registrert i registerordninga.

Helse- og omsorgsdepartementet har gjeve Nasjonalt forskingssenter innan komplementær og alternativ behandling (nafkam.no) i oppdrag å gi befolkninga kunnskapsbasert informasjon om alternativ behandling.