Grunnutdanningane skal dekke:

  • kompetansebehova til tenestene
  • medisinsk og teknologisk utvikling
  • økonomiske, demografiske og internasjonale forhold, og
  • politiske prioriteringar

Dimensjonering i tråd med behova til samfunnet

Universitet og høgskular har ansvar for å dimensjonere studietilboda sine i tråd med behova til samfunnet, mellom anna grunnutdanningar i helse- og sosialfag.

Helse- og omsorgsdepartementet har dialog med Kunnskapsdepartementet om behovet for utdanning av helsepersonell og ved behov for auke i utdanningskapasiteten.

Dimensjonering av helse- og sosialfaga i vidaregåande opplæring blir gjord innanfor rammene til den enkelte fylkeskommunen. Kommunane og dei regionale helseføretaka skal leggje til rette for praksisplassar for elevane/lærlingane/studentane.

I tråd med kompetansebehova til tenestene

Nasjonale retningslinjer innanfor høgare utdanning i helse- og sosialfaga (RETHOS) definerer minimum sluttkompetanse for kvar enkelt utdanning.

Retningslinjene er ein del av eit styringssystem med mål om at utdanningane er framtidsretta og i tråd med kompetansebehova til tenestene og behova til brukarane. Retningslinjene er forskriftsfesta og skal vere førande for arbeidet til institusjonane med utdanningane.

Utdanningsdirektoratet er delegert myndigheit til å utarbeide og fastsette læreplanar for den vidaregåande opplæringa.