Universitet og høgskular har hovudansvar for å dimensjonere opptaket på dei enkelte utdanningane i tråd med behova til samfunnet, mellom anna grunnutdanningar i helse- og sosialfag.

Dimensjonering i tråd med behova til samfunnet

Regjeringa har det overordna ansvaret for den samla kapasiteten i høgare utdanning og høgare yrkesfagleg utdanning.

Kunnskapsdepartementet har det overordna ansvaret for utdannings- og kompetansepolitikken. Helse- og omsorgsdepartementet har dialog med Kunnskapsdepartementet om behovet for utdanning av helsepersonell.

Dimensjonering av helse- og sosialfaga i vidaregåande opplæring blir gjord innanfor rammene til den enkelte fylkeskommunen. Kommunane og dei regionale helseføretaka skal leggje til rette for praksisplassar for elevane/lærlingane/studentane.

I tråd med kompetansebehova til tenestene

RETHOS står for nasjonale retningslinjer for helse- og sosialfagutdanningane og er eit nasjonalt styringssystem i Noreg som sikrar at utdanningane gir riktig og tidsriktig kompetanse.

Formålet med styringssystemet er å utvikle retningslinjer som gjer utdanningane framtidsretta i tråd med kompetansebehovet til tenestene, og i tråd med behova til pasientane og brukarane. Gjennom dette styringssystemet får både tenestene og brukarane innverknad på det faglege innhaldet i utdanningane.

Retningslinjene skal definere sluttkompetansen for kvar utdanning og utgjere ein minstestandard for kompetanse. Direktoratet for høgare utdanning og kompetanse er sekretariat for RETHOS.