Statens helsetilsyn er fagleg uavhengig og har det overordna faglege tilsynet med barneverntenester, einslege mindreårige i asylmottak, sosiale tenester i Nav, helse- og omsorgstenester og folkehelsearbeidet. Varsel om alvorlege hendingar i helse- og omsorgstenesta og IKT i helsetenesta er inkludert i ansvaret. Statens helsetilsyn skal utøve myndigheit i samsvar med det som er fastsett i lover og forskrifter.

Statsforvaltaren er regional tilsynsmyndigheit og klageinstans på tilsynsområda, og er direkte underlagt Helsetilsynet på desse områda.

Skal vareta utsette grupper

Det overordna faglege tilsynsansvaret inneber å ha oversikt over sosiale og helsemessige forhold i befolkninga, med særleg vekt på tenestene si plikt til å oppfylle rettane til utsette grupper. 

Som overordna myndigheit er det også Statens helsetilsyn sitt ansvar å ha god styring av tilsynet med tenestene. Dei skal sørge for koordinering og harmonisering av tilsynet, vedlikehald og styrking av kompetanse, utvikling av tilsynsmetodikk, oppfølging av tilsyn og formidling av tilsynserfaringar.

Plikt til å varsle

Alle verksemder som yter helse- og omsorgstenester har plikt til å varsle Statens helsetilsyn om dødsfall og svært alvorleg skade på pasient eller brukar som har samanheng med helsehjelpa. Varslingsplikta gjeld når utfallet er utanfor pårekneleg risiko.

Pasientar, brukarar og næraste pårørande har rett til å varsle om slike hendingar. Statens helsetilsyn eller statsforvaltaren følger opp varsla i samsvar med det som følger av lover og forskrifter.

Rettstryggleik og forsvarleg drift

Tilsynsmyndigheitene si klagebehandling, tilsyn og rådgiving skal medverke til at:

  • Rettstryggleik, pasienttryggleik og befolkninga sine behov for tenester blir ivaretatt.
  • Barneverntenester, sosiale tenester og helse- og omsorgstenester blir drive forsvarleg og folkehelsearbeid blir ivaretatt.
  • Styrka kvalitet i tenester og tiltak i barnevernet
  • Barnets beste er eit grunnleggande omsyn ved alle handlingar og avgjerder som omhandlar barn.
  • Svikt i tenestene blir førebygd, avdekka og følgt opp.
  • Helse- og omsorgstenestene ivaretar beredskap og tryggleik, inkludert digital tryggleik.

Relevante lovar på feltet

Helse- og omsorgstenester, sosiale tenester i Nav og barneverntenester er regulerte gjennom eit sett av lover og forskrifter som forpliktar alle som yter tenester.

Lovverket stiller krav til kva tenester som skal vere på plass, kva som er forsvarlege tenester, saksbehandling, befolkninga sine rettar osb. Tenesteytarane – både private og offentlege – har ansvar for å overhalde desse krava.

Som ein tryggleik fører myndigheitene tilsyn med at dette skjer, og med at alle som yter tenester sjølve kontrollerer at verksemda er i tråd med krava.

Involvering av partane

Tilsynet rettar seg både mot verksemder og mot helsepersonell. Helsepersonell har pålagde plikter i helsepersonellova (lovdata.no). Tilsynsmyndigheitene skal så langt som mogleg involvere pasientar, brukarar og pårørande i alt tilsyn. 

Statens helsepersonellnemnd behandlar klager på vedtak frå Statens helsetilsyn som gjeld administrative reaksjonar mot helsepersonell og klager på vedtak frå Helsedirektoratet som gjeld avslag på autorisasjon, lisens og spesialistgodkjenning til helsepersonell.

Tilsynsmyndigheit innan strålevern, atomtryggleik, radioaktiv forureining og avfall

Direktoratet for strålevern og atomtryggleik (DSA) er øvste atomtryggleiksmyndigheit i Noreg og fører tilsyn med all bruk av strålekjelder i medisin, industri og forsking. 

Vidare overvaker DSA radioaktiv forureining i ytre miljø og stråling i yrkesliv og hos pasientar. Bruken av strålekjelder innan helsesektoren er omfattande og dekker medisinsk diagnostikk og behandling av pasientar, i tillegg til bruk av strålekjelder i screeningprogram for gitte sjukdomar, slik som til dømes brystkreft.

Det er DSA si oppgåve å sjå til at helseverksemdene har innretta verksemda slik at den er i samsvar med regelverka. Det meste av strålebruken ved helseverksemder er godkjenningspliktig etter strålevernforskrifta.

Plikt til å varsle

Alle verksemder som nyttar strålekjelder til undersøking og behandling av pasientar og kundar samt til industrielle eller forskingsmessige formål har varslingsplikt til DSA ved ulykker og unormale hendingar ved bruk av strålekjeldene.

Hendingar som har eller kan ha samanheng med bruk av medisinsk utstyr, under dette strålegivande apparatur, skal også meldast til DSA. Alvorlege pasienthendingar skal varslast til Statens helsetilsyn.