Legemiddelgrossistar som leverer til apotek, må som hovudregel kunne levere kor som helst i landet i løpet av 24 timar. 

Det er tre store grossistar som leverer i Noreg: Norsk Medsinaldepot AS, Apotek 1 Gruppen AS og Alliance Healthcare Norge AS. 

Legemiddelgrossistar har høve til å selje legemiddel direkte til sjukeheim, til profesjonelle sluttbrukarar av veterinære legemiddel og i avgrensa grad til sjukehus. 

Leveringsplikt for legemiddel

Apoteka i landet har plikt til å levere alle etterspurde legemiddel som er tillat selt i Noreg. I samsvar med apoteklova § 6-2 (lovdata.no) skal legemiddel bli levert «så snart som mogleg».

Lagerplikt for legemiddel som blir etterspurt regelmessig, er meint å sikre god tilgjengelegheit. Per 1. november 2025 var det 1061 apotek i Noreg. Dette talet inkluderer 36 sjukehusapotek eigd av helseføretaka. 

I oktober 2016 blei dei første nettapoteka som også sel reseptpliktige legemiddel, etablert i Noreg. No kan innbyggarar bestille legemiddel på nettet og få dei send direkte heim på døra, eller dei kan henta dei hjå posten. Nettapotek forenklar og forbetrar kvardagen til innbyggarane, og gir dei større valfridom og eit meir variert tilbod. 

Nasjonal legemiddelberedskap

Helsedirektoratet har gjennomgått den nasjonale beredskapen for legemiddel (helsedirektoratet.no), og leverte rapportar i 2019 og 2020. Arbeidet med oppfølging bidrog til at ein raskt kunne sette i verk nødvendige tiltak for å sikre forsyninga under pandemien. 

Mellom anna blei det innført restriksjonar for omsetting for å sikre at legemiddel blir verande i landet, og ved behov kan bli fordelt rettferdig mellom pasientane som treng dei. Det er også sett i verk oppbygging av nasjonale beredskapslager for forsyningskritiske legemiddel. Det er etablert eigne beredskapslagre både for primærhelsetenesta og spesialisthelsetenesta. Desse er vidareførte og vidareutvikla.

Direktoratet for medisinske produkt (DMP) har fått ei tydeleg rolle og ansvar for forsyningstryggleik og beredskap for legemiddel. Dette inneber eit operativt og koordinerande systemansvar for nasjonal forsyningstryggleik og beredskap. Direktoratet skal mellom anna overvake forsyningskjedene, legemiddelberedskapslagera og vurdere auka bruk av juridiske og økonomiske verkemiddel for å sikre tilgangen til forsyningskritiske legemiddel.

Råstoff for kriseproduksjon

Som eit ytterlegare beredskapstiltak er det også kjøpt inn råstoff for eventuell kriseproduksjon av enkelte forsyningskritiske legemiddel.

Internasjonalt samarbeid er viktig for å redusere konsekvensane av legemiddelmangel og sikre god informasjon.

Forsyningstryggleiken og beredskapen i det nordiske samarbeidet er styrka, og Noreg deltar aktivt i EU sitt arbeid for å finne nye tiltak for å styrke forsyningstryggleiken og beredskapen.

Reseptfrie legemiddel

Ved inngangen til 2024 blei det drive 727 medisinutsal som sel reseptfrie legemiddel og som ofte leverer ut reseptpliktige legemiddel som er sendt frå apotek.

Det er berre apotek som har rett til å selje legemiddel til forbrukarar, med mindre anna er bestemt.

Visse reseptfrie legemiddel er tillate å selje frå andre utsalsstader enn apotek. Ordninga er kjend som legemiddel utanom apotek - LUA.