2 Bakgrunn

Finansiering og utbygging av rv. 7 mellom Sokna og Ørgenvika blei vedteke av Stortinget gjennom handsaming av Prop. 157 S (2009–2010) Finansiering og utbygging av rv. 7 på strekninga Sokna – Ørgenvika i Buskerud fylke, jf. Innst. 23 S (2010–2011). Utbygginga blei delvis finansiert med bompengar og innkrevjingsperioden blei rekna til 15 år, med oppstart 28. juni 2014. Prosjektet blei nedbetalt 28. februar 2025, og bompengeinnkrevjinga blei stansa. Dette inneber noko under 11 år med bompengeinnkrevjing. Den tidlege nedbetalinga skuldast i hovudsak at trafikken har vore høgare enn det som blei lagt til grunn i stortingsproposisjonen. Lånerentene på låna til bompengeselskapet har dessutan vore lågare enn føresett.

For å kunne påskunde naudsynte utbetringar av rv. 7 på strekninga mellom Kittilsvik og Gol har kommunane Ringerike, Krødsherad, Flå, Nes, Gol, Ål, Hol og Hemsedal og Buskerud fylkeskommune teke initiativ til, og fatta vedtak om, å vidareføre innkrevjinga av bompengar i dagens bomstasjon på rv. 7 fram til juni 2029, som opphavleg planlagt i bompengeproposisjonen for rv. 7 Sokna – Ørgenvika. Dette blir gjort i påvente av ei eventuell ny vegpakke for Hallingdal. Det ligg føre lokalpolitiske prinsippvedtak om delvis bompengefinansiering av ei slik ny vegpakke.

Forslaget om å vidareføre innkrevjinga av bompengar vil utfordre prinsippa for strekningsvise bompengeprosjekt slik dei blir praktiserte i dag. Det inneber at innkrevjinga vil gå parallelt med gjennomføringa av utbetringstiltaka, og ikkje etter at prosjektet er ferdig bygd. Hovudregelen i dag er etterskotsinnkrevjing som betyr at bompengeinnkrevjinga først startar opp etter at vegane er ferdig bygde og tiltaka er gjennomførte. Ei vidareføring vil òg utfordre den gjeldande praksisen på strekningsvise bompengeprosjekt, der bompengeinnkrevjinga blir avvikla når bompengelånet er nedbetalt. På den andre sida vil ei vidareført bompengeinnkrevjing i dette tilfellet bidra til å løyse trafikale utfordringar ved å få fortgang i naudsynte utbetringar på rv. 7, og dermed gi moglegheit for at vegen får betre trafikktryggleik og framkome på eit tidlegare tidspunkt.

Statens vegvesen sine analysar viser at trafikken som nyttar rv. 7 på strekninga mellom Sokna og Ørgenvika, er kjenneteikna ved ein stor del lange reiser som går gjennom større delar av Hallingdal. Denne trafikken vil dermed også ha nytte av at det skjer utbetringar på strekninga Ørgenvika – Gol. Trafikkteljingar i Ørgenvika-krysset (som er krysset mellom rv. 7 og fv. 280) viser at 99 pst. av trafikken køyrer vidare på rv. 7 og at berre 1 pst. av trafikken som køyrer gjennom dagens bomstasjon på rv. 7, svingar av til fv. 280. Ein transportanalyse gjennomført ved hjelp av den regionale transportmodellen (RTM) viser at 93 pst. av trafikken som passerer gjennom bomstasjonen på rv. 7, passerer rv. 7 nord for Flå, og 78 pst. passerer nord for Nesbyen. Statens vegvesen vurderer derfor at nytteprinsippet blir ivareteke i tilstrekkeleg grad i dette forslaget. Ideelt sett skulle trafikken som nyttar fv. 280 frå Ørgenvika, også ha vore med å betale ved ei parallell- og forskotsinnkrevjing. Det utgjer om lag 1 400 køyretøy i døgnet. Dette er noko som blir vurdert nærare og ivareteke i bompengeløysinga for ei eventuell ny vegpakke for Hallingdal.

Strekninga rv. 7 Ørgenvika – Flå er prioritert i Meld. St. 14 (2023–2024) Nasjonal transportplan 2025–2036 som aktuell for utbetring til ein høgare standard med betre framkome og auka trafikktryggleik. Det er vidare aktuelt å sjå dette i samanheng med utbyggingsprosjektet rv. 7 Ørgenvika – Kittilsvik, som ligg i Statens vegvesen si planportefølje og som er prioritert for gjennomføring i den første seksårsperioden i planen. Dette er føresett lokalpolitisk tilslutning til delvis bompengefinansiering. I Nasjonal transportplan 2025–2036 opnar regjeringa også for at transportverksemdene kan vurdere korleis bompengane på lengre utbetringsstrekningar kan nyttast meir effektivt i kombinasjon av forskots-, parallell- og etterskotsinnkrevjing, dersom det framstår som føremålstenleg og løysingane er i tråd med nytteprinsippet. Etter Statens vegvesen si vurdering kan rv. 7 gjennom Hallingdal vere ei aktuell strekning som eit pilotprosjekt for ei slik innkrevjingsløysing som kombinerer forskots-, parallell- og etterskotsinnkrevjing.

Det er behov for nærare å greie ut korleis rv. 7 gjennom Hallingdal skal utbetrast og finansierast innanfor rammene som er gitt i Nasjonal transportplan 2025–2036. Dette arbeidet er sett i gang, og i løpet av den vidareførte innkrevjingsperioden tek Statens vegvesen sikte på å komme tilbake med ei eiga sak til aktuelle kommunar og Buskerud fylkeskommune om korleis rv. 7 gjennom Hallingdal, inkludert rv. 7 Ørgenvika – Kittilsvik, kan utbetrast og finansierast innanfor rammene i Nasjonal transportplan 2025–2036.