Kommunen kan gi forskrift om at det skal betalast overvassgebyr, storleiken på gebyra i kommunen og innkreving av gebyra. Kommunale overvassgebyr skal vere eit årleg gebyr.

Når ein fast eigedom har avrenning til eit kommunalt overvassanlegg, skal eigaren betale overvassgebyr til kommunen i samsvar med forskrift gitt i medhald av første ledd.

Med kommunalt overvassanlegg er meint eit anlegg for oppsamling, transport, avleiing eller behandling som er eller skal bli etablert for å førebyggja skadar som følgje av overvatn, og som heilt eller delvis er eigd av kommunen.

Departementet skal gi forskrift om rammene for kommunale vass- og avløpsgebyr og overvassgebyr etter §§ 4 og 4 a og om utrekning og innkreving av gebyra.

Eit forfalle krav på årsgebyr etter denne lova er sikra med lovpant i eigedomen etter pantelova § 6-1. Både årsgebyr og eingongsgebyr for tilknyting til kommunal vass- eller avløpsleidning er tvangsgrunnlag for utlegg.

For å sikre at føresegnene i denne lova eller vedtak i medhald av lova blir følgde, kan kommunen gjere vedtak om tvangsmulkt til kommunen. I vedtaket skal det givast ein frist for retting av forholdet. Tvangsmulkta byrjar å gjelde først dersom forholdet ikkje er retta innan fristen.

Kommunen kan ikkje gjere vedtak om tvangsmulkt for forhold i strid med §§ 7 eller 8 utan at det på førehand er gjort enkeltvedtak etter § 7 tredje ledd eller § 8 tredje ledd eller gitt pålegg i medhald av § 14 om retting av forholdet.

Vedtak om tvangsmulkt er tvangsgrunnlag for utlegg.

Dersom ikkje anna er avtala, skal krav som etter §§ 4, 4 a, 7, 8, 11, 12, 14, 15 og 16 blir retta mot eigaren av eigedomen, i staden rettast mot festaren av grunnen når

• a. festaren har arvefeste

• b. det er att minst 30 år av festetida når kravet kjem opp

• c. festeavtala gir festaren rett til å krevje festetida forlengd så mykje at det blir att ei festetid på minst 30 år når kravet kjem opp.