Helse- og omsorgsdepartementet har overordna ansvar for regelverket på drikkevassområdet. Det er vassverka sitt ansvar at vatnet oppfyller krava i drikkevassforskrifta (lovdata.no).

Rettleiing og tilsyn  

Mattilsynet har ansvar for rettleiing og tilsyn på drikkevassområdet (mattilsynet.no).

Folkehelseinstituttet bidrar med kunnskapsstøtte og har ansvaret for Nasjonal vassvakt (fhi.no), som er ei døgnbemanna rådgivingsteneste for vassverk som treng råd og støtte ved akutte hendingar som kan påverke vassforsyninga og medføre helsemessige konsekvensar for befolkninga.

Folkehelseinstituttet har råd og informasjon om drikkevatn på nettsidene sine (fhi.no). Regjeringa har fastsett Nasjonale mål for vatn og helse med gjennomføringsplan. 

Rapporteringsplikt

Vassverk som leverer vatn til 50 personar eller meir er rapporteringspliktige. Knappe 90 prosent av befolkninga får vatn frå slike vassverk. Rapportar viser at dei får drikkevatn av god kvalitet frå sitt vassverk. Resten av befolkninga har enten eiga privat vassforsyning eller får vatn frå små private vassforsyningar.

Tilgang til trygt drikkevatn er grunnleggande for helsa til folk, men også avgjerande for ei rekkje funksjonar i samfunnet som helseinstitusjonar, skular og matprodusentar, og for praktisk talt alle typar verksemder.

Sikker levering av drikkevatn er også avgjerande for tilgang til slokkevatn og for at avløpssystema skal fungere.

Må tole kriser

Den daglege drifta til vassverka må vere robust, slik at dei også er rusta til krisesituasjonar. Det er viktig med sårbarheitsanalysar, førebyggande sikring og gode beredskapsplanar, og at desse blir oppdaterte og øvd på. 

Klimaendringar med meir ekstremvêr og flaum kan også gi utfordringar som vassverka må vere førebudde på.