Lova gir reglar om forholdet mellom pasient og helseteneste/helsepersonell og set fokus på pasienten og behova til pasienten.

Lova må likevel sjåast i samanheng med andre lover som rører ved helsetenesta, som til dømes helsepersonellova (lovdata.no), spesialisthelsetenestelova (lovdata.no), helse- og omsorgstenestelova (lovdata.no) og lov om psykisk helsevern (lovdata.no), i tillegg til fleire andre lover og forskrifter.

Gjeld for både offentlege og private

Delar av pasient- og brukarrettslova gjeld for all helseteneste i Noreg, både den offentlege og den private helsetenesta. Den offentlege helsetenesta kan delast inn i tre tenesteområde: den kommunale helse- og omsorgstenesta (også kalla primærhelsetenesta), spesialisthelsetenesta og tannhelsetenesta.

Pasient- og brukarrettslova (lovdata.no) gir mellom anna reglar om:

  • Retten til å bli pasient – retten til å få vurdert helsetilstanden sin og til å få nødvendig helsehjelp innan ein individuelt fastsett frist
  • Retten til å medverke ved gjennomføringa av helsehjelpa og til å få informasjon
  • Retten til teieplikt om personlege opplysningar
  • Retten til innsyn i eigen journal
  • Retten til å klage og andre saksbehandlingsreglar som skal sikre at pasienten oppnår rettane sine
  • Samtykke til helsehjelp

Utval som skal vurdere lova

Regjeringa har nedsett eit utval som skal greie ut ei ny pasient- og brukarrettslov (Pasient- og brukarrettslovutvalet).

Målet er ei lov som er lettare for pasientar, brukarar, pårørande og fagfolk å forstå, og som samtidig bidrar til likeverdig tilgang til helse- og omsorgstenester.

Utvalet skal levere utgreiinga si i form av Norsk offentleg utgreiing (NOU) innan 14. mai 2027.