1 HOVUDINNHALDET I PROPOSISJONEN

I denne proposisjonen blir det gjort framlegg om å oppheve lov av 11. juni 1982 nr. 42 om rettledningstjenesten i fiskerinæringen.

I proposisjonen går departementet inn for å slå saman dei noverande to ytre etatar i fiskeriforvaltninga, Fiskeridirektoratets Kontrollverk og Rettleiingstenesta i fiskerinæringa, til ein etat, både regionalt og lokalt. Det er også gjort framlegg om å avvikle ordninga med fiskeristyre og fiskerinemnd.

Vurderinga til departementet er at det ikkje er naturleg å la eit felles ytre forvaltningssystem under Fiskeridirektoratet vere regulert i ei eiga lov. Ansvar og oppgåver for Rettleiingstenesta i fiskerinæringa har også endra seg sidan lova blei etablert, og etaten er i dag blitt ein integrert del av den samla fiskeri- og havbruksadministrasjonen. Deler av formålet med lova fell elles bort som følgje av framlegget om å avvikle fiskeristyra og fiskerinemndene.