2 Administrasjon m.m.

Kap. 1300 Samferdselsdepartementet

Post 21 Spesielle driftsutgifter

I 2025 er det løyvd 8,4 mill. kr på posten. Samferdselsdepartementet foreslår å redusere løyvinga med 1 mill. kr.

Løyvinga på posten dekker utgifter til utgreiingar og tidsavgrensa utvalsarbeid. Behovet for midlar til nokre utgreiingar og til utvalet som skal revidere veglova, blir lågare enn tidlegare lagt til grunn.

Post 22 Utgifter ved kjøp av obligasjonsgjeld i Norske tog AS

I 2025 er det løyvd 7,1 mill. kr på posten. Departementet foreslår å redusere løyvinga med 5,3 mill. kr.

Løyvinga dekker departementet sine utgifter til ekstern juridisk og finansiell støtte i samband med tilbakekjøp av obligasjonsgjeld frå Norske tog AS. Utgiftene er anslått til 1,8 mill. kr.

Post 90 Kjøp av obligasjonsgjeld i Norske tog AS

I 2025 er det løyvd 2 200 mill. kr på posten, og departementet fekk fullmakt til å overskride løyvinga med inntil 6 750 mill. kr, jf. Prop. 146 S (2024–2025) Tilleggsbevilgninger og omprioriteringer i statsbudsjettet 2025 og Innst. 540 S (2024–2025). Samferdselsdepartementet foreslår no å auke løyvinga med 3 170,8 mill. kr.

Løyvinga skulle dekke tilbakekjøp av den uteståande obligasjonsgjelda til Norske tog AS. Det var uvisse om kor stor del av denne gjelda staten kunne kjøpe tilbake. Tilbakekjøpet av obligasjonsgjeld blei gjennomført i september 2025 og utgjorde til saman 5 370,8 mill. kr. Med forslaget om auka løyving svarar løyvinga på posten til tilbakekjøpt gjeld.

Kap. 4300 Samferdselsdepartementet

Post 90 (Ny)Tilbakebetaling av obligasjonslån

Samferdselsdepartementet foreslår å budsjettere med 158 mill. kr i tilbakebetaling av obligasjonslån.

Eitt av låna som staten kjøpte tilbake, jf. omtale under kap. 1300, post 90 Kjøp av obligasjonsgjeld i Norske tog AS, forfell til betaling i november 2025. Norske tog AS skal da betale tilbake lånebeløpet (hovudstolen) på 158 mill. kr til staten.