5 Særskilde transporttiltak

Kap. 1330 Særskilde transporttiltak

Post 70 Kjøp av transporttenester på strekninga Bergen–Kirkenes

I 2025 er det løyvd 1 228,4 mill. kr på posten. Samferdselsdepartementet foreslår å auke løyvinga med 161 mill. kr.

Staten har kontraktar med reiarlaga Hurtigruten Coastal AS og Havila Kystruten AS om drift av kystrutetenesta mellom Bergen og Kirkenes i perioden 2021–2030. I kontraktane står det at vederlaget blir justert etter Statistisk sentralbyrås indeks for innanriks sjøfart, delindeks ferje med drivstoffkomponent. Hausten 2025 reviderte Statistisk sentralbyrå delindeksen med drivstoffkomponenten LNG (flytande naturgass). Denne delindeksen blir nytta i kontrakten med Havila Kystruten. Endringa i delindeksen inneber at staten må nedjustere vederlaget til Havila Kystruten for 2021 og oppjustere det for åra 2022–2025. Staten må derfor betale i alt 161 mill. kr meir til Havila Kystruten for perioden 2021–2025. Revisjonen av indeksen påverkar ikkje vederlaget til Hurtigruten Coastal.

Budsjettforslaget for 2026 blei lagt fram før Statistisk sentralbyrå publiserte den reviderte indeksen. Endringa av indeksen vil auke løyvingsbehovet med om lag 60 mill. kr i 2026. Departementet vil komme tilbake til saka i samband med revidert nasjonalbudsjett for 2026.