4 Vegformål
Kap. 1320 Statens vegvesen
Post 22 Drift og vedlikehald av riksvegar
I 2026 er det løyvd 11 662,3 mill. kr på posten. Samferdselsdepartementet foreslår å auke løyvinga med 50 mill. kr m.a. for utgifter til å rydde opp og reparere vegen etter skredet ved E134 i Etne kommune i Vestland og driftsutgifter på mellombels omkøyringsveg på E6 etter raset ved Nesvatnet i Levanger kommune i Trøndelag.
Statens vegvesen har registrert auka prisvekst innan drift og vedlikehald av riksvegar frå første til andre kvartal, m.a. grunna auka oljeprisar. Vegvesenets vedlikehaldsaktivitet blir noko redusert samanlikna med det som var planlagt, m.a. innan vedlikehald av vegdekke.
Post 32 Fellesprosjektet Vossebana/E16 Arna–Stanghelle
I 2026 er det løyvd 1 150 mill. kr på posten. Samferdselsdepartementet foreslår å redusere løyvinga med 250 mill. kr fordi prosessen for anskaffing av den første tunnelentreprisen i prosjektet har tatt lengre tid enn venta.
Post 67 Militær mobilitet på fylkesvegar
I 2026 er det løyvd 102 mill. kr på posten. Samferdselsdepartementet foreslår å redusere løyvinga med 60 mill. kr.
Det var planlagt å starte bygginga av fire fylkesvegbruer i 2026. Etter ferdig prosjektering viser oppdaterte kostnadsanslag frå fylkeskommunane høgare byggekostnader enn det som låg til grunn for budsjettet. Det er ut frå dette berre mogleg å gi tilskot til to bruer i 2026.
Post 72 Tilskot til riksvegferjedrifta
I 2026 er det løyvd 3 724,5 mill. kr på posten. Samferdselsdepartementet foreslår å redusere løyvinga med 50 mill. kr. Utbetalingar i nokre kontraktar blir lågare på grunn av avvik mellom kontraktskrava og det ferjeoperatøren har levert. Vidare er det venta lågare kompensasjon for utskifting av brannskum i ferjer.
Kap. 4320 Statens vegvesen
Post 05 (Ny) Renter frå forskotsbetaling på ferje
Samferdselsdepartementet foreslår å inntektsføre 131,6 mill. kr som er renteinntekter knytt til AutoPASS for ferje.
Statens vegvesen har avtale med ein tenesteleverandør for levering av tenester for AutoPASS for ferje. Ein av betalingsmåtane bygger på at trafikantar betaler inn forskot for å oppnå rabatt ved bruk av ferje. Etter avtalen skal tenesteleverandøren opprette ein særskild konto for forskotsinnbetalingar frå trafikantane og oppgjer til ferjeselskapa. Det har over fleire år blitt generert renteinntekter på kontoen. Desse har Statens vegvesen krav på. Dei akkumulerte renteinntektene til og med 2025 utgjer 131,6 mill. kr, og dei er no innbetalte til staten.
Statens vegvesen arbeider med å lage ei ny løysing for AutoPASS for ferje etter at gjeldande kontraktsperiode går ut 30. september 2027. Det er venta renteinntekter fram til dette tidspunktet. Samferdselsdepartementet vil komme tilbake til handteringa av renteinntekter som blir opparbeidde etter 2025 i samband med revidert nasjonalbudsjett 2027.