5 Finanspostar og kapitalrekneskapen

5.1 Finansinntekter og finansutgifter

Staten hadde i 1999 renteinntekter på 14,2 mrd. kroner og renteutgifter på 15,6 mrd. kroner. Frå 1998 til 1999 gjekk rentene av den innanlandske statsgjelda ned med om lag 1,7 mrd. kroner. Rentene av den utanlandske statsgjelda gjekk ned med om lag 1 mrd. kroner. Renteinntektene gjekk opp 1,9 mrd. kroner frå 1998 til 1999.

5.2 Statens balansekonto

I samsvar med det nye Økonomireglementet for staten og Funksjonelle krav til økonomiforvaltningen i staten har ein frå og med 1996 søkt i større grad å vise kapitalrekneskapspostar under dei enkelte departementa, jf. St.prp. nr. 74 (1996-97).

Statens balansekonto omfattar ikkje investeringar i t.d. bygging av vegar, flyplassar og sjukehus. Slike investeringar vert ført til utgift i det året aktiviteten går føre seg og kjem difor ikkje til uttrykk på balansekontoen. Investeringar i forretningsdrifta vert derimot aktiverte og kjem med på balansekontoen som fast kapital.

Sum eignelutar auka med 93,0 mrd. kroner frå 1998 til1999. Den største endringa fell på spesielle fond og forsikringar, som auka med 53,7 mrd. kroner. Statsgjelda gjekk ned med 5,2 mrd. kroner.

5.3 Garantiar

Garantiane hadde ved utgangen av 1999 ei samla ramme på 75,8 mrd. kroner og eit samla ansvar på 59,1 mrd. kroner.

Samla utbetalingar var på 242,4 mill. kroner i 1999.

Dei største garantiutbetalingane var knytta til Garanti-Instituttet for Eksportkreditt (GIEK), statsgaranti ved eksport, SUS/Baltikumordningen, samt Norsk Koksverk under Nærings- og handelsdepartementet.

5.4 Offentlege fond under forvaltning av Finansdepartementet

Rekneskapen for 1999 omfatter 78 fond mot 85 fond i 1998. 13 fond har falle bort i 1999, anten fordi fonda er avslutta eller overført til ein annan rekneskapsførar.

Fonda har i 1999 hatt ei samla inntekt på 3 186,5 mill. kroner og ei samla utgift på 3 820,5 mill. kroner. Det gjev eit samla driftsunderskot på 634 mill. kroner.

Av inntektene er 2 762 mill. kroner løyvde over statsbudsjettet. Dei største løyvingane gjeld Fond for SND og fylkeskommunane med 1 747,3 mill. kroner, og Landbrukets utviklingsfond med 580 mill. kroner.

Opptente renteinntekter og aksjeutbyte er 116,5 mill. kroner. Dette svarar til 5,26 pst. av samla renteberande fondskapital per 31. desember 1999.

Inneståande i statskassa frå fond som er skipa med løyving over statsbudsjettet får ikkje rente. Landbrukets utviklingsfond og Utviklings- og investeringsfondet for reindrifta utgjer eit unntak. For desse fonda har Stortinget bestemt at inneståande i statskassa skal gje renter. Landbrukets utviklingsfond har i 1999 hatt ei renteinntekt på 42 mill. kroner.

Det er i perioden overført 531 mill. kroner til statskassa og 1 386 mill. kroner til SND. Ymse tilskot på i alt 1 727 mill. kroner er elles dei største utgiftene til fonda. Av dette utgjer tilskot frå Landbrukets utviklingsfond 609 mill. kroner og tilskot til kommunar og fylkeskommunar frå fonda for lokal og regional næringsutvikling 492 mill. kroner.

Avskrivingar på lån og tap på verdipapir er 2,4 mill. kroner. Dei samla eignelutane til fonda er per 31. desember 1999 bokførde med 4 786 mill. kroner. Av eignelutane står 3 103,4 mill. kroner som innskot i statskassa, 1 491,3 mill. kroner er lån til landbruket.

Samla kapital i fonda per 31. desember 1999 er 4 679,5 mill. kroner. Andre kreditorar utgjer tilsaman 106,5 mill. kroner.

General vinst- og tapskonto og balansekonto til fonda er tekne inn under bolken Offentlege fond i tillegget til denne meldinga.