1 Innleiing og samandrag

Konvensjon om skiping av ein mellomstatleg organisasjon for utvikling og utnytting av digitale havsystem og informasjonstenester (Mercator internasjonale senter for havet) vart vedteken 23. april 2025 og underteikna under FNs havkonferanse i Nice 9. juni 2025.

Konvensjonen definerer m.a. formålet for den nye organisasjonen, arbeidsspråk, prosedyrar for opptak av medlemsstatar, stemmegiving og finansiering.

Konvensjonen definerer formålet til Mercator internasjonale senter for havet til å utforme, utvikle og drifte verdsleiande digitale havprognosetenester og havinformasjonstenester for medlemsstatane, internasjonal havforvalting m.fl. Tenestene skal også inkludere marin fysikk, biogeokjemi og økosystem.

Sidan konvensjonen inneber budsjettvedtak og blir rekna som ei sak som er særleg viktig, er Stortingets samtykke til ratifikasjon nødvendig etter Grunnlova § 26 andre ledd.

Konvensjonen i engelsk originaltekst med omsetjing til norsk følgjer som trykt vedlegg til proposisjonen.