3 Utgifter

3.1 Totaloversikt over utgiftssida

Løyvingsrekneskapen for 1997 syner at dei totale utgiftene har vore 536,1 mrd kroner mot 534,4 mrd kroner løyvt i nysaldert budsjett. Dette gir ei meirutgift på 1,7 mrd kroner. Denne meirutgiften må mellom anna sjåast i samanheng med ein forventa meirutgift under Forsvarsdepartementet ut frå at store løyvingar vart overført frå 1996 til 1997. Nærare omtale av avvik mellom løyving og rekneskap for 1997 er gitt under punkt 1.3.

Nedanfor er sett opp eit oversyn over utviklinga av dei samla utgiftene under dei einskilde departementa for åra 1993-1997.

Det har vore endring i strukturen på departementa i perioden slik at tala ikkje kan samanliknast direkte. Dette gjeld mellom anna Kommunal- og arbeidsdepartementet. Frå 1994 er rammetilskotttet løyvt under Kommunal- og arbeidsdepartementet med 31,7 mrd kroner med ein tilsvarande samla nedgang under Kyrkje-, utdannings- og forskingsdepartementet, Kulturdepartementet, Sosial- og helsedepartementet og Samferdselsdepartementet. Frå 1997 er dei inntektsutjamnande tilskotta løyvde over Kommunal- og arbeidsdepartementet i staden for å overførast frå Skattefordelingsfondet. Løyvingane til inntektsutjamnande tilskott utgjer 12,9 mrd kroner for 1997.