1 Hovudinnhaldet i proposisjonen

Kommunal- og distriktsdepartementet legg med dette fram forslag til endringar i bustøttelova om handsaming av personopplysningar og automatiserte avgjerder.

Departementet foreslår ei ny føresegn i bustøttelova § 8. Den nye føresegna gjer det tydeleg kva for kategoriar av opplysningar som kan handsamast ved sakshandsaming av søknader om bustøtte, medrekna kven det kan handsamast opplysningar om. I tillegg blir det foreslått eit nytt siste ledd som gir departementet ein klar heimel til å regulere nærmare detaljar i forskrift om handsaming av personopplysningar.

Departementet foreslår også ei ny føresegn i bustøttelova § 8 som gir eit tydeleg rettsgrunnlag for heilautomatiserte avgjerder i saker om bustøtte. Føremålet med forslaget er å gi Husbanken ei lovføresegn som sikrar eit klart handsamingsgrunnlag for heilautomatiserte avgjerder.

Departementet foreslår ein ny § 8 d i bustøttelova om handsaming av personopplysningar for forsking, statistikk og analysar. Føresegna handlar om korleis Husbanken vidarehandsamar opplysningar som stammar frå den statlege bustøtta. Føre-målet til Husbanken med handsaminga skal vere forsking, statistikk og analysar for å oppnå føremåla som er nemnde i husbanklova § 1. Departementet foreslår også å lovfeste at Husbanken kan lagre personopplysningar til forskingsføremål. Departementet foreslår at den nye føresegna gir heimel for nærmare regulering i forskrift. Forslaget har som føremål at Husbanken skal kunne handsame og systematisere data og bidra til at krava til handsaming av personopplysningar blir haldne.

Til slutt foreslår departementet ein ny § 8 e i bustøttelova om handsaming av personopplysningar til test, drift og utvikling av IT-systema til Husbanken. Føremålet med den nye føresegna er å klargjere at Husbanken har heimel til å bruke personopplysningar til desse føremåla, men berre dersom ein ikkje kan nå føremålet ved å bruke anonyme eller fiktive opplysningar.