5 Rettar og plikter

I tillegg til den generelle helselovgivinga er det fleire regelverk som gjeld smittevern, og spesielt allmennfarlege smittsame sjukdommar. Smittevernlova gir smitta og truleg smitta personar rettar og plikter og pålegg kommunar og regionale helseføretak tilsvarande forpliktingar. Etter smittevernlova § 6-1 har alle rett til nødvendig smittevernhjelp. Smittevernhjelp er å rekne som ein del av retten til nødvendige helse- og omsorgstenester, jf. pasient- og brukarrettslova § 2-1 første og andre ledd og § 2-2.

Den som etter ei fagleg vurdering blir rekna for å vere i fare for å bli smitta med ein allmennfarleg smittsam sjukdom (mellom anna hepatitt B og C), har rett til nødvendig smittevernhjelp i form av vaksinasjon, informasjon og anna nødvendig førebyggjande hjelp. Vaksine mot hepatitt B inngår i barnevaksinasjonsprogrammet (sjå forskrift om nasjonalt vaksinasjonsprogram). Kommunane er forplikta til å tilby barnevaksinasjonsprogrammet til alle barn i førskule- og grunnskulealder. Ein person som er smitta eller truleg smitta med ein allmennfarleg smittsam sjukdom, har rett til nødvendig smittevernhjelp, inkludert medisinsk vurdering og utgreiing (diagnostikk), behandling og pleie.

Forskrift om rett til helse- og omsorgstjenester til personer uten fast opphold i riket fastset rett til omgåande hjelp, helsehjelp som ikkje kan vente, m.m., og smittevernhjelp, jf. smittevernlova § 6-1, til alle personar som oppheld seg i riket.

Smittevernhjelp skal tilbydast utan kostnad for personar som er i fare for å bli smitta eller er smitta med ein allmennfarleg smittsam sjukdom. Utgiftene blir dekte gjennom ulike ordningar: Hepatitt B-vaksine og -immunglobulin blir dekt etter blåreseptforskrifta § 4 nr. 3, og undersøking, behandling og oppfølging blir dekt etter forskrift om stønad til dekning av utgifter til undersøkelse og behandling hos lege § 3 nr. 7, forskrift om betaling frå pasientar for poliklinisk helsehjelp i spesialisthelsetenesta § 5 bokstav h og forskrift om stønad til dekning av utgifter til undersøkelse og behandling i private medisinske laboratorie- og røntgenvirksomheter § 4 nr. 7. Legemiddel til behandling av hepatitt B og C blir dekte gjennom H-reseptordninga.

Etter MSIS-forskrifta § 2-1 har alle legar som oppdagar eller får mistanke om at ein person er smitta av ein smittsam sjukdom som er nemnd i vedlegg A til forskrifta, inkludert hepatitt B og C, plikt til å melde til Folkehelseinstituttet og kommunelegen i kommunen der den smitta bur.