2 Forslag til endringar i statsbudsjettet 2025

Kap. 1700 Forsvarsdepartementet

Post 01 Driftsutgifter

Regjeringa foreslår å redusera løyvinga på posten med 19,5 mill. kroner som følge av følgande saker:

Regjeringa foreslår å auka løyvinga med 3,1 mill. kroner i samband med inngåing av utanrettsleg forlik i den rettslege prosessen etter havariet av KNM Helge Ingstad, grunna utgifter til saksomkostingar. Regjeringa foreslår også å auka løyvinga med 1,3 mill. kroner, som følge av at inntektene for revisjonstenester til Forsvarshistorisk museum vart auka i samband med revidert nasjonalbudsjett, jf. Innst. 540 S (2024–2025) til Prop. 146 S (2024–2024). Forsvarsdepartementet innfører Nasjonal hemmeleg plattform (NHP) for høggradert kommunikasjon og sakshandsaming. I den forbindelse foreslår regjeringa ein auke av løyvinga (1,0 mill. kroner). Utgiftene til husleige er endra. Regjeringa foreslår derfor å redusera løyvinga på posten med 11,9 mill. kroner.

Knytt til militær støtte til Ukraina foreslår regjeringa å redusera løyvinga med 3,4 mill. kroner, jf. omtale på kap. 1700, post 79. Vidare foreslår regjeringa å redusera løyvinga med 11,9 mill. kroner grunna reduserte utgifter til gjennomføring av toppmøtet i Joint Expeditionary Force (JEF).

Regjeringa foreslår også tekniske endringar som inneber å omdisponera midlar internt på forsvarsbudsjettet. Endringane består mellom anna av utgifter til leige av fly til NATO sitt høgnivåbesøk i Nord-Noreg, som til saman aukar løyvinga på posten med 2,3 mill. kroner, mot tilsvarande reduksjon på andre kapittel og postar.

Post 21 Spesielle driftsutgifter, overslagsløyving

Regjeringa foreslår å auka løyvinga på posten med 39,7 mill. kroner som følge av at Statens pensjonskasse sin prognose for utbetalingar til den særskilte kompensasjonsordninga for psykiske belastningsskadar som følge av at deltaking i internasjonale operasjonar (jf. forsvarsloven § 55) har blitt høgare enn budsjettert.

Post 22 IKT-verksemd, kan overførast

Ved behandlinga av revidert nasjonalbudsjett for 2025, jf. Innst. 540 S (2024–2025) til Prop. 146  S (2024–2025), vart ansvaret for eigarstyringa og oppfølginga, derunder budsjetteringa, av Program Felles IKT, overført frå Forsvarsdepartementet til Digitaliserings- og forvaltningsdepartementet. Regjeringa foreslår å redusera løyvinga på posten med 14 mill. kroner, mot ein tilsvarande auke på Digitaliserings- og forvaltningsdepartementet sitt kap. 1515, post 45.

Post 43 Til disposisjon for Forsvarsdepartementet, kan overførast

Regjeringa foreslår å redusera løyvinga på posten med 1,1 mill. kroner for leige av fly til NATO sitt høgnivåbesøk i Nord-Noreg, jf. omtale på kap. 1700, post 01.

Post 52 Overføring til statlege forvaltningsorgan

Regjeringa foreslår å auka løyvinga på posten med 3,4 mill. kroner for betaling av ein faktura frå 2024 frå Innovasjon Noreg for Forsvarsdepartementet sin andel av utgiftene til forsvarsindustrirådar som forfall til utbetaling i 2025.

Post 53 Risikokapital, NATOs innovasjonsfond

Kapitalinnskotet i NATO innovasjonsfond er i euro. Grunna valutaendringar foreslår regjeringa å auka løyvinga på posten med 0,01 mill. kroner.

Post 72 Tilskot til Noregs forskningsråd, kan overførast

Grunna justert anslag for tilskot til Forskningsrådet foreslår regjeringa å redusera løyvinga med 0,9 mill. kroner.

Post 78 Noregs tilskot til NATOs og internasjonale driftsbudsjett, kan overførast

Tilskot til auka produksjonskapasitet

Regjeringa foreslår å auka løyvinga på posten med totalt 150,0 mill. kroner mot tilsvarande reduksjon som omtalt på kap. 1700, post 79, til enkeltståande tilskot for oppskalering av produksjonskapasitet i norsk forsvarsindustri. Formålet med tilskota er å støtta prosjekt der det sikkerheitspolitiske bakteppet krev rask oppskalering, men der bedriftene opplever større usikkerheit rundt langsiktig etterspørsel. Tilskota skal utløysa investeringar i tidskritiske kapasitetar for forsvarsevna hjå Ukraina, Noreg og andre allierte. Grunna tidshensyn sett i lys av den tryggingspolitiske situasjonen foreslår regjeringa bruk av enkeltståande tilskot, og ikkje ein ordinær tilskotsordning.

Det er verksemdene Kongsberg Defence & Aerospace, Nammo AS og Chemring Nobel AS som kan søka om enkeltståande tilskot. Støtta skal gå til auka produksjonskapasitet. Bedriftene er valde ut fordi dei produserer hhv. luftvern, rakettmotorar, artilleriammunisjon og avansert militært sprengstoff. Dette er definert som prioriterte satsingar i regjeringa sitt vegkart for auka produksjonskapasitet og det er snakk om produkt til Ukrainas forsvarskamp der norsk industri er blant få leverandørar i vesten. Den totale ramma til tilskota er foreslått til 450 mill. kroner innan den militære delen av Nansen-programmet med utbetalingar på 150 mill. kroner fordelt på hhv. 2025, 2026 og 2027.

Den nedre grensa for enkeltståande tilskot vert sett til 50 mill. kroner. Relevans for Ukraina, produksjonsauke, kostnad og kostnadseffektivitet, leveringsplan og moglegheit for gjennomføring, innovasjon og tidsramme for prosjektforslaga vil fungera som tildelingskriterium. Rapportering på prosjekta skal beskriva status og oppnådde resultat av tilskotet og bidra til oppfølging og kontroll. Forsvarsmateriell vil forvalta tilskota på vegne av Forsvarsdepartementet. Regjeringa foreslår at det i 2025 vert løyvd 150 mill. kroner til utbetaling av enkeltståande tilskot for oppskalering av produksjonskapasitet i norsk forsvarsindustri.

Verksemdene har levert fem søknader. Regjeringa tilrår å gi enkeltståande tilskot til tre prosjekt, eit til kvar av dei følgande verksemdene i 2025–2027: Chemring Nobel AS, Nammo AS og Kongsberg. Chemring Nobel AS mottar totalt 235 mill. kroner for å gjennomføre fase 2 av ein moglegheitstudie for ein ny fabrikk for avansert militært sprengstoff, Nammo AS mottar totalt 156 mill. kroner for å styrka sin produksjon av rakettmotorar og Kongsberg mottar totalt 54 mill. kroner for å greia ut moglegheita for å produsere AMRAAM i Noreg. Tilrådinga fører til at 149 mill. kroner går til Nammo AS og 1 mill. kroner til Kongsberg i 2025.

Enkeltståande tilskot – Nammo AS

Regjeringa foreslår eit enkeltståande tilskot på 350 mill. kroner til etablering av ytterlegare rakettmotorproduksjon ved Nammo AS. Formålet med tilskotet er å gi Nammo AS moglegheit til å gå til innkjøp av produksjonsutstyr for ei fjerde rakettmotorlinje.

Enkeltståande tilskot – Chemring Nobel AS

Regjeringa foreslår eit enkeltståande tilskot på 67 mill. kroner til Chemring Nobel AS for å bidra til at Chemring Nobel AS kan bygga opp produksjon av heksamin hjå Dynea AS. Heksamin er ein viktig innsatsfaktor for sprengstoff framstilt av Chemring Nobel.

Post 79 Militær støtte til Ukraina, kan overførast, kan nyttast under kap. 1710, post 01 og 47, kap. 1720, post 01 og kap. 1760, post 01 og 45

Regjeringa foreslår å auka løyvinga på posten med 1 850,4 mill. kroner, som følge av følgande saker:

Regjeringa foreslår å auka løyvinga med 10 887,3 mill. kroner mot tilsvarande reduksjon på kap. 1760, post 45. Auka er grunna i behov for å nytta ein større andel av midlane Stortinget løyvde gjennom handsaming av Innst. 227 S (2024–2025) til Prop. 107 S (2024–2025), gjennom internasjonale finansieringsmekanismar. Midlane vil kunne nyttast til å finansiera militært materiell for å støtta Ukraina i møte med den russiske åtakskrigen, til dømes gjennom NATO og nære allierte som USA, Storbritannia, Tyskland, Danmark samt Tsjekkia. Samarbeidet vil bygga på eksisterande avtalar for å ivareta tempo i gjennomføringa. For slike samarbeid vil det likevel vere usikkert om delar av midlane utbetalast først i 2026. Omsetningsevne i 2025 er ein risiko som gjeld den militære delen av Nansen-programmet samla sett, tiltaka som nemnt ovanfor søkar å avdempa risiko for manglande omsetning.

Regjeringa har i 2025 donert materiell frå forsvarssektoren som skal gjenanskaffast seinare år for 6 235,0 mill. kroner. Verdien av donert materiell frå forsvarssektoren vert trekt ifrå ramma på Nansen-programmet på donasjonstidspunktet, mot tilsvarande auke når gjenanskaffinga kjem til utbetaling. I saldert budsjett 2025 vart det trekt frå 2,0 mrd. kroner i påvente av forventa donasjonar i 2025. I revidert nasjonalbudsjett 2025 vart det trekt frå ytterlegare 4 090,4 mill. kroner for donasjonar så langt i 2025. Regjeringa foreslår nå ein reduksjon på 606,3 mill. kroner. Reduksjonen skjer som følge av donasjonar av militært materiell frå forsvarssektoren.

Regjeringa foreslår å auka løyvinga med 3,4 mill. kroner mot tilsvarande reduksjon på kap. 1700, post 01, for følgande saker: Auka utgifter til attachékontoret i Kyiv (2,5 mill. kroner), utgifter til ressursar i samband med arbeidet med forvaltning, styring og kontroll i Forsvarsdepartementet sin oppfølging av den militære støtta til Ukraina (4,2 mill. kroner) og eit mindrebehov grunne ein forseinking i ein moglegheitsstudie med Chemring Nobel for auka produksjonskapasitet (10,0 mill. kroner).

Regjeringa foreslår å redusera løyvinga med 150,0 mill. kroner mot tilsvarande auke på kap. 1700, post 78, for etablering av ein midlertidig søknadsbasert ordning som gir enkeltståande tilskot til konkrete prosjekt for auka produksjonskapasitet i norsk forsvarsindustri. Det er satt av 150 mill. kroner årleg i perioden 2025–2027 i den militære støtta i Nansen-programmet.

Regjeringa foreslår å redusera løyvinga med 1 135,6 mill. kroner mot tilsvarande auke på kap. 1720, post 01. Auka på kap. 1720, post 01, omfattar: Tiltak i den maritime koalisjonen Noreg leiar saman med Storbritannia (180 mill. kroner), Forsvaret sine utgifter i samband med etableringa av eit nordisk-baltisk-polsk trenings- og utrustningsinitiativ (700 mill. kroner), Forsvaret sine utgifter i samband med oppfølging av donasjonar og trening (92 mill. kroner) samt endringar gjennom året i utgifter hjå Forsvaret til gjennomføring av tiltak i den militære støtta til Ukraina (163,6 mill. kroner).

Regjeringa foreslår å redusera løyvinga med 7 206,2 mill. kroner mot tilsvarande auke på kap. 1760, post 45. Auka på kap. 1760, post 45, omfattar: Anskaffingar, trening og opplæring og donasjonar gjennom den maritime kapabilitetskoalisjonen som Noreg leiar saman med Storbritannia (2 590,0 mill. kroner), utgifter i samband med militær støtte innanfor dronar og autonomi (1 890,0 mill. kroner), Forsvarsmateriell sine utgifter i samband med etableringa av eit nordisk-baltisk-polsk trenings- og utrustingsinitiativ (742,2 mill. kroner), tiltak gjennom «den norske modellen» og utgifter til å anskaffa materiell for donasjon til Ukraina gjennom ein søknadsbasert portal der norsk industri kan foreslå relevante prosjekt for Ukraina (1 700,0 mill. kroner), donasjonar og anskaffingar til støtte for Ukraina innanfor andre innsatslinjer (284,0 mill. kroner).

Regjeringa foreslår å auka løyvinga med 67,9 mill. kroner med tilsvarande auke av løyvinga på kap. 4700, post 01. Noreg har mottatt kompensasjon frå EU i samband med gjennomføring av F-16 trening. Refusjonen er direkte knytt til konkrete utgifter i samband med gjennomføringa av den militære støtta i Nansen-programmet. Midlane vil inngå i ramma for den militære støtta i 2025 og vert nytta til nye tiltak i 2025.

Post 90 Kapitalinnskot, NATOs innovasjonsfond

Kapitalinnskotet i NATO innovasjonsfond er i euro. Grunna valutaendringar foreslår regjeringa å auka løyvinga med 0,02 mill. kroner.

Kap. 4700 Forsvarsdepartementet

Post 01 Driftsinntekter

Regjeringa foreslår å auka løyvinga med 67,9 mill. kroner, med ein tilsvarande utgiftsauke som omtalt på kap. 1700, post 79.

Post 85 Aksjeutbytte

Regjeringa foreslår å flytta løyvinga på posten til kap. 5645 Rygge 1 AS, post 85 (ny) Utbytte.

Kap. 5645 Rygge 1 AS

Post 85 (Ny) Utbytte

Regjeringa foreslår å oppretta posten i nysalderinga av 2025-budsjettet. Forsvarsdepartementet har fått utbetalt 15,0 mill. kroner i aksjeutbytte frå Rygge 1 AS. Regjeringa foreslår ei løyving på 15,0 mill. kroner på posten, mot ein tilsvarande utgiftsauke på andre kapittel og postar, jf. Forsvarsdepartementet sin meirinntektsfullmakt.

Kap. 1710 Forsvarsbygg og nybygg og nyanlegg

Post 01 Driftsutgifter, kan overførast

Regjeringa foreslår å redusera løyvinga på posten med 104,4 mill. kroner, som følge av følgande saker:

Anslaga for utgifter til eigendomsforvaltning og forsyning er redusert med hhv. 13,1 og 133,8 mill. kroner. Sistnemnte dreier seg i hovudsak om lågare energiprisar. Regjeringa foreslår derfor å redusera løyvinga på posten med 146,9 mill. kroner. Endringa har ei tilsvarande redusert inntektsside på kap. 4710, post 01.

Leigeinntekter i sektoren vert regulert av inngåtte avtalar mellom Forsvarsbygg og dei respektive verksemdene. Forsvarsbygg oppdaterer fortløpande prognoser og fakturerer basert på faktiske endringar i leigeforholda gjennom året. Anslag for leige vart redusert etter revidert nasjonalbudsjett 2025, mellom anna på grunn av utkjøp av leigd teltleir på Skjold (Hæren), i tillegg til justeringar av leigeforhold i porteføljen.

Det er nødvendig å korrigera ei fordeling av leigeutgifter som vart gjort i revidert nasjonalbudsjett 2025 i samband med priskompensasjon og fordeling av midlar til ekstra verdibevaring av eigendom. Av dette utgjer 30,9 mill. kroner ei justering av leigeutgifter mellom Forsvaret og Forsvarsbygg. Vidare dreier 13,0 mill. kroner seg om fordeling av husleige mellom Forsvarsbygg og andre etatar i forsvarssektoren.

For korrigering av overføring av midlar til løyvingsfinansiert reinhald til Forsvaret foreslår regjeringa å redusera løyvinga på posten med 1,3 mill. kroner, mot tilsvarande auke som inngår i dei tekniske endringane på kap. 1720, post 01.

Post 47 Nybygg og nyanlegg, kan overførast, kan nyttast under kap. 1760, post 45

Regjeringa foreslår å auka løyvinga på posten med 701,0 mill. kroner, som følge av følgande saker:

Regjeringa foreslår å auka løyvinga på posten med totalt 690 mill. kroner til investeringar i eigendom, bygg og anlegg (EBA). I 2025 har Forsvarsbygg nytta 690 mill. kroner utover gjeldande løyving, mot tilsvarande mindreforbruk på kap. 1760, post 45, jf. stikkordsfullmakta på kap. 1760, post 45 om at løyvinga kan nyttast under kap. 1710, post 47. Forslaget gjeld EBA-delen av materiellprosjekt i langtidsplanen som vert budsjettert på kap. 1710, post 47. Auken er knytt til endra periodisering av prosjekt som inngår i langtidsplanen, og som ikkje var kjent ved framlegginga av revidert nasjonalbudsjett 2025.

Forsvarsbygg skal bygga ein plasthall på Trandum for oppbevaring av museumsgjenstandar for Forsvarshistorisk museum. Regjeringa foreslår å auka løyvinga på posten med 11,0 mill. kroner, mot tilsvarande reduksjon på Forsvarshistorisk museum sitt kap. 1730, post 01.

Kap. 4710 Forsvarsbygg og nybygg og nyanlegg

Post 01 Driftsinntekter

Regjeringa foreslår å redusera løyvinga med 146,9 mill. kroner, jf. omtale under kap. 1710, post 01.

Post 47 Sal av eigendom

Posten omfattar netto inntekter frå sal av fast eigedom. Utgiftene til avhending er blitt lågare enn forutsett. Regjeringa foreslår å auka løyvinga på posten med 3,3 mill. kroner.

Kap. 1716 Forsvarets forskingsinstitutt

Post 51 Tilskot til Forsvarets forskingsinstitutt

Utgiftene til husleige er redusert. Regjeringa foreslår å redusera løyvinga med 3,2 mill. kroner, jf. omtale av husleige på kap. 1710, post 01.

Kap. 1720 Forsvaret

Post 01 Driftsutgifter

Regjeringa foreslår å auka løyvinga på posten med 750,5 mill. kroner, som følge av følgande saker:

Regjeringa foreslår å auka løyvinga med 1 135,6 mill. kroner til tiltak til støtte for Ukraina jf. omtale på kap. 1700, post 79. Kystverket, som betalar Forsvaret for slepeberedskap, fekk auka løyving til slepeberedskap i revidert nasjonalbudsjett 2025. Regjeringa foreslår å auka løyvinga på posten med 99,1 mill. kroner til slepeberedskap, med tilsvarande auke som omtalt under kap. 4720, post 01. Vidare foreslår regjeringa å redusera løyvinga med totalt 614,1 mill. kroner for mindreutgifter som følge av forsinka innføring av ny godtgjeringsmodell for reservistar (371,0 mill. kroner) og andre driftsmessige mindrebehov (243,1 mill. kroner), i hovudskap knytt til lågare straumprisar.

Endringar av roller, ansvar og myndigheit i forsvarssektoren har enkelte budsjetteffektar. I samband med flytting av mellom anna årsverk, IKT-materiell og -lisensar, og materielldrift og vedlikehald, frå Forsvarsmateriell til Forsvaret foreslår regjeringa å auka løyvinga på posten med 134,5 mill. kroner, mot tilsvarande reduksjon på kap. 1760, post 01. Vidare foreslår regjeringa tekniske endringar som inneber å omdisponera midlar internt på forsvarsbudsjettet, som totalt sett reduserer løyvinga på posten med 4,5 mill. kroner.

Post 71 Overføringar til andre, kan overførast

Regjeringa foreslår å overføra midlar for arbeidet med Forsvarsretta tryggleiksreform (FSSR) frå Forsvarsdepartementet til Forsvaret. Regjeringa foreslår å auka løyvinga på posten med 2,3 mill. kroner, mot tilsvarande reduksjon på kap. 1700, post 01.

Kap. 4720 Forsvaret

Post 01 Driftsinntekter

Regjeringa foreslår å auka løyvinga på posten med 103,4 mill. kroner, som følge av følgande saker:

Regjeringa foreslår å auka løyvinga med 99,1 mill. kroner for utgifter til den statlege slepeberedskapen, jf. omtale under kap. 1720, post 01. Som følge av endringar av roller, ansvar og myndigheit i forsvarssektoren og flytting av mellom anna årsverk mellom Forsvarsmateriell og Forsvaret foreslår regjeringa å auka løyvinga på posten med 4,3 mill. kroner, mot tilsvarande reduksjon på kap. 4760, post 01.

Kap. 1730 Forsvarshistorisk museum, utgifter

Post 01 Driftsutgifter

Regjeringa foreslår å auka løyvinga på posten med 0,2 mill. kroner, som følge av følgande saker:

Utgiftene til husleige og forsyning har auka, og regjeringa foreslår derfor å auka løyvinga med 7,1 mill. kroner. Regjeringa foreslår også å auka løyvinga med 6,0 mill. kroner med ein tilsvarande inntektsauke som omtalt på kap. 4730, post 01. Vidare foreslår regjeringa tekniske endringar som inneber å omdisponera midlar internt på forsvarsbudsjettet, som totalt sett reduserer løyvinga med 1,9 mill. kroner. Vidare foreslår regjeringa å redusera løyvinga med 11,0 mill. kroner mot tilsvarande auke som omtalt på kap. 1710, post 47.

Kap. 4730 Forsvarshistorisk museum, inntekter

Post 01 Driftsinntekter

Inntektene frå billettsal, sal i museumsbutikk og andre museumsrelaterte inntekter har auka. Regjeringa foreslår derfor å auka løyvinga på posten med 6,0 mill. kroner. Inntektene vert nytta til inndekning av museumsrelaterte utgifter på kap. 1730, post 01.

Kap. 1735 Etterretningstenesta

Post 21 Spesielle driftsutgifter

Knytt til ein teknisk endring foreslår regjeringa å auka løyvinga med 5,6 mill. kroner.

Kap. 1740 Statens graderte plattformtenesta, utgifter

Post 01 Driftsutgifter, kan overførast, kan nyttas under 1740, post 45

Regjeringa foreslår å auka løyvinga på posten med 29,5 mill. kroner, som følge av følgande saker:

Regjeringa foreslår å auka løyvinga med 21,0 mill. kroner for meirutgifter med tilsvarande inntektsside, jf. omtale på kap. 4740, post 01. Vidare har utgiftene til husleige og forsyning auka, regjeringa foreslår å auka løyvinga med 8,5 mill. kroner.

Kap. 4740 Statens graderte plattformtenesta, inntekter

Post 01 Driftsinntekter

Grunna auka inntekter frå Statens graderte plattformtenesta sine tenestemottakarar foreslår regjeringa å auka løyvinga med 21,0 mill. kroner. Auken har ein tilsvarande utgiftsside som omtalt på kap. 1740, post 01.

Kap. 1760 Forsvarsmateriell og større anskaffingar og vedlikehald

Post 01 Driftsutgifter, kan nyttast under kap. 1760, post 45

Regjeringa foreslår å redusera løyvinga på posten med 77,9 mill. kroner, som følge av følgande saker:

Endringar av roller, ansvar og myndigheit i forsvarssektoren har enkelte budsjetteffektar. I samband med flytting av mellom anna årsverk, materiell og IKT-lisensar frå Forsvarsmateriell til Forsvaret foreslår regjeringa å redusera løyvinga på posten med 26,8 mill. kroner, mot tilsvarande auke på kap. 1720, post 01. Tilsvarande for overføring av årsverk og anna knytt til materielldrift og vedlikehald frå Forsvarsmateriell til Forsvaret foreslår regjeringa å redusera løyvinga på posten med 107,7 mill. kroner, med tilsvarande auke på kap. 1720, post 01.

Regjeringa foreslår å auka løyvinga med 5,0 mill. kroner for prosjektstillingar i Forsvarsdepartementet i pågåande investeringsprosjekt. Vidare foreslår regjeringa ein reduksjon på 3,4 mill. kroner i justert anslag til leigeutgifter hjå Forsvarsbygg, og ein auke på 55,0 mill. kroner til auka utgifter til avhending av materiell.

Post 44 Fellesfinansierte investeringar, nasjonalfinansiert andel, kan overførast

Regjeringa foreslår ei teknisk endring som reduserer løyvinga på posten med 0,2 mill. kroner.

Post 45 Større utstyrsanskaffingar og vedlikehald, kan overførast, kan nyttast under kap. 1700, post 79 og 1710, post 47

Regjeringa foreslår å redusera løyvinga på posten med 4 196,4 mill. kroner, som følge av følgande saker:

Knytt til militær støtte til Ukraina foreslår regjeringa å redusera løyvinga med 3 671,1 mill. kroner, jf. omtale på kap. 1700, post 79. For å mogleggjera auka investeringar i eigendom, bygg og anlegg som omtalt under kap. 1710, post 47, foreslår regjeringa å redusera løyvinga med 138,1 mill. kroner. For å dekka inn meirutgifter i Redningshelikoptertenesta foreslår regjeringa ei rammeoverføring på 55,8 mill. kroner til Justis- og beredskapsdepartementet sitt kap. 454, post 01. For disponering av inntekter frå avhending foreslår regjeringa å auka løyvinga med 42,8 mill. kroner, jf. omtale på kap. 4760, post 45.

Noreg har mottatt meirinntekter frå sal av Naval Strike Missile (NSM) til Storbritannia. Regjeringa foreslår å auka løyvinga på posten med 650,0 mill. kroner, med ein tilsvarande inntektsauke på kap. 4760, post 45. Basert på valutakursar per 1. september 2025 foreslår regjeringa å redusera løyvinga til valutakompensasjon av store investeringsprosjekt med 1 077,2 mill. kroner. På grunn av meirinntekter frå NATO sitt investeringsprogram for tryggleik foreslår regjeringa å auka løyvinga på posten med 67,4 mill. kroner, mot tilsvarande reduksjon på kap. 1760, post 75. Vidare foreslår regjeringa fleire tekniske endringar som inneber å omdisponera midlar internt på forsvarsbudsjettet, knytt til mellom anna ei flytting av midlar til prosjektstillingar frå Forsvarsmateriell til Forsvaret, som fører med seg ein reduksjon av løyvinga på totalt 14,3 mill. kroner.

Tidspunkt for belastning av utgiftsløyvingar

Det alt vesentlege av kontraktar som vert inngått med leverandørindustrien i samband med investeringsprosjekt er langsiktige tilverkingskontraktar. Det vil vera vesentleg ressursinnsats hjå leverandørane før det kjem til leveransar. Leverandørane forventar, og det er i samsvar med normal forretningsmessig praksis, at kunden må bidra med finansiering av kontraktgjennomføringa gjennom betaling på forskot og ved milepælar. Med bakgrunn i langtidsperspektivet i kontraktane vil dette vera utbetalingar som vil måtte skje før budsjettåret leveransane skjer. Forsvarsdepartementet foreslår derfor at fullmakt IX om tidspunkt for belastning av utgiftsløyvingar vert utvida til å omfatta utbetalingar til leverandørar der dette er økonomisk forsvarleg og naudsynt av forretningsmessige årsaker, jf. forslag til romartalsvedtak V.

Forskot er spesielt aktuelt knytt til kjøp av forsvarsmateriell frå ukrainsk forsvarsindustri. Stort bruk av forskot i avtalar med ukrainske leverandørar er heilt naudsynt for å få gjennomført kjøp av forsvarsmateriell frå ukrainsk forsvarsindustri. Regjeringa viser til særskilt omtale av risiko i gjennomføring av den militære støtta til Ukraina i Prop. 107 S (2024–2025). Utbetaling av forskot til ukrainsk forsvarsindustri inneber ein auka økonomisk risiko. Gjennom den norske modellen og Forsvarsmateriell sin etablerte praksis for gjennomføring av anskaffingar frå norsk og ukrainsk industri søker regjeringa å redusera risikoen forbundet med anskaffingar til eit akseptabelt nivå.

Post 48 Fellesfinansierte investeringar, fellesfinansiert del, kan overførast

Noreg har fått tilsegn om støtte til fleire pre-finansierte prosjekt frå investeringskomiteen til NATO sitt investeringsprogram for tryggleik (NSIP). Regjeringa foreslår derfor å auka løyvinga på posten med 705,6 mill. kroner, med tilsvarande auke på kap. 4760, post 48.

Post 75 Fellesfinansierte investeringar, Noregs tilskot til NATO investeringsprogram for tryggleik, kan overførast, kan nyttast under kap. 1760, post 44

Det er lågare utbetalingar enn forutsett i NATO sitt investeringsprogram for tryggleik (NSIP) i 2025. Dette inneberer at Noreg sin andel blir lågare enn venta, og regjeringa foreslår derfor å redusera løyvinga med 67,4 mill. kroner, mot tilsvarande auke på kap. 1760, post 45.

Kap. 4760 Forsvarsmateriell og større anskaffingar og vedlikehald

Post 01 Driftsinntekter

Regjeringa foreslår å auka løyvinga på posten med 112,7 mill. kroner, som følge av følgande saker:

Inntektene frå royalties og avhending har auka. I tillegg har Forsvarsmateriell mottatt midlar i samband med ei erstatningssak. Regjeringa foreslår derfor å auka løyvinga med 117,0 mill. kroner. For overføring av årsverk mellom Forsvarsmateriell og Forsvaret foreslår regjeringa å redusera løyvinga på posten med 4,3 mill. kroner, mot tilsvarande auke på kap. 4720, post 01.

Post 45 Større utstyrsanskaffingar og vedlikehald, inntekter

Regjeringa foreslår å auka løyvinga på posten med 163,9 mill. kroner, som følge av følgande saker:

Sal av F-16 til Romania er forsinka til 2026, og regjeringa foreslår derfor å redusera løyvinga med 900,0 mill. kroner. Vidare kjem 57,0 mill. kroner i auka inntekter frå avhending av P-3 Orion, med ein utgiftsauke på 42,8 mill. kroner på kap. 1760, post 45, jf. Forsvarsdepartementet sin meirinntektsfullmakt. Noreg har mottatt meirinntekter frå sal av Naval Strike Missile (NSM) til Storbritannia. Regjeringa foreslår å auka løyvinga på posten med 650,0 mill. kroner, med ein tilsvarande utgiftsauke på kap. 1760, post 45.

Staten v/Forsvarsdepartementet og selskapet Nato Helicopter Industries SAS (NHI) og selskapet sine morselskap har inngått forlik etter heving av kontrakt om kjøp av NH90-helikoptre til Forsvaret. Forliket inneber ei verdioverføring til staten tilsvarande 305 mill. euro (om lag 3,6 mrd. kroner) i tillegg til tidlegare utbetalte bankgarantiar på om lag 70 mill. euro. 10 pst. av forliksbeløpet blir innbetalt i inneverande år. Regjeringa foreslår å auka løyvinga på posten med 356,9 mill. kroner. Inntektene vil tilkomma staten.

Post 48 Fellesfinansierte investeringar, inntekter

Noreg har fått tilsegn om støtte til fem nye pre-finansierte prosjekt i NATO sitt investeringsprogram for tryggleik (NSIP) og regjeringa foreslår å auka løyvinga på posten med 705,6 mill. kroner, med tilsvarande auke på kap. 1760, post 48.

Kap. 1791 Redningshelikoptertenesta

Post 01 Driftsutgifter

Regjeringa foreslår å auka løyvinga på posten med 231,2 mill. kroner, som følge av følgande saker:

Regjeringa foreslår på Justis- og beredskapsdepartementets budsjett ein auke i løyvinga til Redningshelikoptertenesta knytt til auka driftsutgifter på 133,3 mill. kroner. Auka løyving legg til rette for å oppretthalda beredskapsnivået til redningshelikoptera. Endringar i avtalt budsjettnivå fører til ei auke av løyvinga med 145,2 mill. kroner på kap. 1791, post 01 og kap. 4791, post 01.

Vidare foreslår regjeringa å auka løyvinga med 42,0 mill. kroner, mot tilsvarande reduksjon som inngår i netto driftsmessige mindrebehov på 243,1 mill. kroner på kap. 1720, post 01, for inndekning av meirforbruk i 2024.

Vidare foreslår regjeringa tekniske endringar som inneber å omdisponera midlar internt på forsvarsbudsjettet, mellom anna som følge av fordeling av pensjonsutgifter mellom Redningshelikoptertenesta og Forsvaret, som aukar løyvinga på posten med 44,0 mill. kroner.

Kap. 4791 Redningshelikoptertenesta

Post 01 Driftsinntekter

Regjeringa foreslår å auka løyvinga med 145,2 mill. kroner, jf. omtale under kap. 1791, post 01.