Staten sin kontantbehaldning var 56,1 mrd. kroner høgare ved utgangen av 2003. Kontantbehaldninga er plassert i Noregs Bank.

Auken i spesielle fond og forsikringar var på 245,7 mrd. kroner og kjem i hovudsak av auken i bokført verdi i Statens petroleumsfond på 242,5 mrd. kroner jf. kap. 6 i denne meldinga. Statens varekrigsforsikring er redusert med 1,1 mrd. kroner medan andre fond i kontogruppa syner ein auke på 4,3 mrd. kroner.

Auken i verdipapir mm. er netto 12,9 mrd. kroner, fordelt med 8,8 mrd. kroner i netto auka behaldning av aksjar og ein auke på 4,0 mrd. kroner i kapital i statsføretak og verksemder med særskilde fullmakter. Auken under statsføretak gjeld i hovudsak Statskraft SF. Auka verdi av aksjar kjem mellom anna av aktivering av aksjar under Samferdsledepartementet med 10,4 mrd. kroner, fordelt med 7,4 mrd. kroner for Avinor AS, 1,9 mrd. kroner for Mesta AS og 0,97 mrd. kroner for Flytoget AS. Aktivering av aksjar for Avinor AS har samanheng med at staten sin kapital i Luftfartsverket i kontogruppe 68 er redusert ved omdanning til Avinor AS. Behaldninga av aksjar under Nærings- og handelsdepartementet er redusert med netto 1,6 mrd. kroner. Mellom anna er behaldninga for Telenor AS redusert med 2,7 mrd. kroner. Aksjane i Arcus AS og AS Olivin er selt og behaldninga redusert med i alt 0,17 mrd. kroner. Argentum AS er aktivert med 1,2 mrd. kroner, som har samanheng med tilsvarande nedgang i kapitalen i SND under kontogruppe 66. Sjå tabell 3.7 for oversyn over statens aksjeinteresser.

Auken i utlån og uteståande fordringar er netto 1,5 mrd. kroner. Av dette er 4,2 mrd. kroner auka utlån for Statens lånekasse, 1,8 mrd. kroner redusert utlån for Husbanken og 1,2 mrd. kroner redusert utlån til tilsette i staten gjennom Statens pensjonskasse. Lån til helseføretaka auka med 2,1 mrd. kroner, medan lån til Svinesundforbindelsen AS auka med 0,3 mrd. kroner. Lån til Statkraft SF vart redusert med 0,4 mrd. kroner og lån til Entra Eiendom AS vart redusert med 1,5 mrd. kroner.

Auken for ordinære fond er på 6,9 mrd. kroner. Av dette utgjer 5,5 mrd. kroner Fondet for forsking og nyskaping medrekna kapitaliserte renter og 0,8 mrd. kroner konverteringsfondet i Statens lånekasse. Ludvig Holbergs minnefond er etablert med 0,2 mrd. kroner. Finansmarknadsfondet auka med 0,1 mrd. kroner og fond under Kommunal- og regionaldepartementet med 0,5 mrd. kroner, medan fond under Nærings- og handelsdepartementet samla vart redusert med 0,3 mrd. kroner. Ein må sjå kontogruppe 64 Ordinære fond i samanheng med kontogruppe 81 Kontolån frå ordinære fond. Midla som fonda har ståande på konto i Noregs Bank er òg ført opp som kontolån til staten.

Nedgangen i forskot er på 0,2 mrd. kroner som i hovudsak gjeld forskot under Samferdsledepartementet for Statens vegvesen og Jernbaneverket og forskot på rammetilskot til fylkeskommunar og kommunar under Kommunal- og regionaldepartementet.

Nedgangen i fast kapital i statsbankane på 1,2 mrd. kroner kjem i hovudsak av at kapitalen i Statens nærings- og distriktsutviklingsfond er satt ned i samband med at aksjane for Argentum AS vart aktivert, jf. note 3.

Nedgangen i fast kapital i statsverksemdene på 9,7 mrd. kroner kjem i hovudsak av at kapitalen er redusert med 11,6 mrd. kroner ved omdanninga av Luftfartsverket til Avinor AS og at kapitalen i SDØE auka med 1,5 mrd. kroner. Sjå òg tabell 3.2 i vedlegg 3.

Statlege verksemder sitt mellomvære med statskassa gjekk ned med 2,4 mrd. kroner, slik at verksemdene har 5,8 mrd. kroner til gode per 31.12.2003. Om lag 1,3 mrd. kroner av dette gjeld omlegginga av rekneskapsføringa av betalt meirverdiavgift. I motsetnad til tidlegare, vert innbetalt meirverdiavgift ikkje lenger rekneskapsført i løyvingsrekneskapen før ein har teke imot og registrert tal frå dei avgiftspliktige. Det er i 2003 postert netto 120,6 mill. kroner mot konto for forskyvingar i balansen, jf. fullmakt frå Stortinget til å postere differansar i rekneskapen mot konto for forskyvingar i balansen. Det alt vesentlige gjeld Landbruksforvaltninga. Under Finansdepartementet er det sett av 111 mill. kroner som vart utgiftsført kapital til Finansmarknadsfondet, jf. kap. 1600, post 90. Under Utdannings- og forskingsdepartementet er det sett av 139 mill. kroner som vart utgiftsført kapital til konverteringsfondet i Statens lånekasse for utdanning, under kap. 2410, post 50. Kapitalen for desse to fonda vart ikkje flytt frå oppgjerskonto i Noregs Bank til fondas konti i Noregs Bank i 2003, men dette har ingen verknad på statens samla kontantbehaldning i Noregs Bank per 31.12.2003, då alle desse kontoane reknas med i kontantbehaldninga. Avsetjinga går fram av mellomvære fram til overføring til fondas konti skjer i 2004.

Alle statens valutabyteavtaler er forfalne og valutabytekontoen er avvikla. Sjå òg tabell 3.3 og 3.4 i vedlegg 3.

Som følgje av over/underkurs på statsobligasjonslån, er bokført verdi redusert med 2,9 mrd. kroner.

Staten sin immuniseringsportefølje vart avvikla i 2003 og konto for valutakursregulering er avvikla som følgje av dette

Statsgjelda er auka med 48,8 mrd. kroner i 2003. Dette kjem dels av at ein har brukt låneinstrumenta til staten til å trekkje inn overskotslikviditet frå pengemarknaden og dels at ein i 2003 utvida primærhanldlarordninga til òg å omfatta kortsiktige statspapir. Noregs Bank auka difor si behaldning av statspapir. Denne meiropplåninga har sitt motstykke i auka kontantbehaldning. Sjå tabell 3.5 i vedlegg 3 for nærare spesifikasjon av endring i statsgjelda.

Kontogruppe 81 Kontolån frå ordinære fond omfattar alle ordinære fond som har fondsmidlar plasserte i statskassa på konto i Noregs Bank. Dei fonda der staten òg eig og kan disponere fondskapitalen, er i tillegg aktivert i kontogruppe 64 Ordinære fond. Auken for 2003 er på 6,4 mrd. kroner. Av dette utgjer 5,5 mrd. kroner Fondet for forsking og nyskaping. Sjå tabell 3.1 i vedlegg 3 for detaljar.

Kontogruppe 82 omfattar verksemder med særskilde fullmakter til å nettoføre utgifter og inntekter. Verksemdene sine likvide midlar er plasserte i Noregs Bank. Staten kan nytta denne likviditeten, som vert notert som gjeld i kapitalrekneskapen. Sjå tabell 3.1 i vedlegg 3 for detaljar.

Deposita og avsetjingar syner ein auke på 7,7 mrd. kroner. Av dette er det vesentligaste avsetjinga til Statens petroleumsfond som auka med 6,4 mrd. kroner, frå -3,9 mrd. kroner til 2,5 mrd. kroner. Avsetjinga til Statens petroleumsforsikringsfond auka med 1,5 mrd. kroner.

Unytta løyvingar som vert overført til neste budsjettår, vert registrerte som gjeld i statsrekneskapen. Overføringane til 2004 er samla 6,998 mrd. kroner, noko som er 70,9 mill. kroner lågare enn overført løyving frå 2002. I talet er overførte løyvingar på 90-post (lånetransaksjonar) med. Overførte løyvingar utanom 90-poster er 6,484 mrd. kroner, jf. kapittel 1.

Avslutningskontoen med staten sin eigenkapital auka i 2003 med 243,1 mrd. kroner frå 812,9 mrd. kroner til 1 056,0 mrd. kroner, jf. note 1-17 ovanfor. Sjå òg tabell 1.11 i vedlegg 1.