Sterk inntektsvekst i 2009 gir betre kommunale tenester

Regjeringa legg opp til ein inntektsvekst på mellom 7 og 7½ milliardar kroner for kommunane i 2009. Bortsett frå 2006-budsjettet frå denne regjeringa, er dette den sterkaste inntektsveksten som er varsla på mange år.

- Eg er svært nøgd med at regjeringa fortset si satsing på lokal velferd. På tre år har den raud-grøne regjeringa styrka kommuneøkonomien med 20,8 milliardar kroner. No kan altså kommunane gleda seg over ein ytterlegare auke neste år, seier kommunal- og regionalminister Magnhild Meltveit Kleppa.

I 2006 - 2007 har kommunesektoren mellom anna fått på plass 26.000 fleire barnehageplassar og i 2004 - 2007 tilsett nesten 8000 fleire innan pleie- og omsorgssektoren.

- Eg er imponert over det kommunane har fått til så langt. No skal regjeringa sjå til at kommunane kan fortsetja den gode satsinga si. Meir pengar til kommunane betyr at innbyggarane vil merka betre omsorgstenester, ein endå betre skule og eit godt barnehagetilbod til alle barn, seier Kleppa.

Av den samla inntektsveksten i 2009 kjem mellom 3½ og 4 milliardar kroner som frie inntekter. Det økonomiske opplegget for 2009 legg til rette for mellom anna fleire årsverk i pleie- og omsorgstenesta og ein betre skule.

Kommunal- og regionaldepartementet sin pressetelefon: 22 24 25 00.