Svar på skriftleg spørsmål om omstillingsmiddel til Landbruksdirektoratet

Skriftleg svar på spørsmål nr. 1413 frå stortingsrepresentant Tone Merete Sønsterud om omstillingsmiddel til Landbruksdirektoratet

Eg syner til skriftleg spørsmål nr. 1413 frå stortingsrepresentant Tone Merete Sønsterud 24. april. Sønsterud stilte følgjande spørsmål:

Viser til kronikk i Nationen 18. april, "Regjeringen sviktar landbruksforvaltninga ved å nekta omstillingsmiddel", skrevet av tillitsvalgte fra Akademikerne, Delta og NTL i Landbruksdirektoratet, se vedlegg. Hva er ministerens vurdering av påstander og spørsmål i kronikken?

Regjeringa vedtok i fjor haust å flytte 30 årsverk frå Landbruksdirektoratet i Oslo til ei ny eining i Steinkjer. Eininga i Steinkjer skal vera på plass innan oktober 2020.

Regjeringa ynskte med vedtaket, der det blei lagt stor vekt på distriktspolitiske omsyn, å bidra til å skape ei meir balansert lokalisering av statlege arbeidsplassar og å vera med på å byggje opp gode kompetansemiljø òg utanfor dei største byane.

Landbruksdirektoratet er godt i gang med å følgje opp vedtaket om utflytting. Eg har stor forståing for at dette er eit krevjande arbeid, men har tillit til at direktoratet òg i omstillingsperioden vil klare å utføre oppgåvene sine på ein tilfredstillande måte.

Det vil vera budsjettmessige konsekvensar av flyttevedtaket. Desse vil bli handsama i dei ordinære budsjettprosessane framover.

Med helsing

Jon Georg Dale