Auka produksjon med fleire energikjelder
Historisk arkiv
Publisert under: Regjeringen Bondevik II
Utgjevar: Olje- og energidepartementet
Pressemelding | Dato: 06.10.2004 | Sist oppdatert: 24.10.2006
- Satsinga på ny energiproduksjon gjer at andre energikjelder enn vasskraft kan få ei større rolle i energiforsyninga i åra framover. (6.10.04)
Pressemelding
Nr.: 110/04
Dato: 6.10.2004
Kontaktperson: Sissel Edvardsen, 22 24 61 09
Auka produksjon med fleire energikjelder
- Satsinga på ny energiproduksjon gjer at andre energikjelder enn vasskraft kan få ei større rolle i energiforsyninga i åra framover. Da er det viktig at vi greier å ta det unike norske ressursgrunnlaget i bruk med fleire energiberarar. Det er ein langsiktig utfordring å auke tilgangen på kraft i Noreg, og dette krev ei omlegging både av energiproduksjon og energibruk, seier olje- og energiminister Thorhild Widvey.
Nytt nasjonalt program for utvikling av miljøvennlege
gasskraftteknologiar
Regjeringa legg vekt på at auka innanlands bruk av
gass kan gi betre vilkår for verdiskapinga, energiforsyninga og
miljøet. Satsinga på utvikling av nye gasskraftteknologiar er
viktig i denne samanhengen. Regjeringa vidareførar dette arbeidet
gjennom etableringa av innovasjonsverksemda for miljøvennlege
gasskraftteknologiar i Grenland.
Den nye innovasjonsverksemda skal i samarbeid med Noregs forskingsråd opprette eit nytt nasjonalt gassteknologiprogram, og det vil samla være om lag 150 millionar kroner tilgjengeleg på forsking og utvikling (FoU) og innovasjon på dette området.
Innovasjonsverksemda skal ha fokus på å delfinansiere prosjekt som blir vurderte til å ha klart kommersielt potensial og ein marknadsbasert forretningsplan. Gassteknologifondet, som blei etablert 1. juli 2004, blir den primære finansieringskjelda til utprøvings- og demonstrasjonsaktivitetane. I 2005 vil innovasjonsverksemda disponere ei løyving på 45,9 millionar kroner, og ei tilsegnsfullmakt på 50 millionar kroner. Noregs forskingsråd vil disponere 50 millionar kroner til føremålet.
Offensiv politikk for å auke bruken av naturgass
Regjeringa har varsla ein offensiv politikk for å
auke bruken av naturgass innanlands. Det samla potensialet for bruk
av naturgass er spreidd på mange stader, og det vil ta tid å byggje
opp marknadene. Derfor er det best å satse på transportløysingar
som kan vekse i takt med at bruken aukar.
Regjeringa foreslår å auke løyvingane til mottaksterminalar for LNG* og transmisjonsrøyr til 24 millionar kroner i 2005. Dette er ei auke på 5 millionar kroner i høve til saldert budsjett 2004, og 20 millionar kroner i høve til gjeldande budsjett i 2004. Ei tilsegnsfullmakt på 20 millionar kroner er med på å stadfeste den langsiktige strategien.
*LNG = Liquefied Natural Gas = nedkjølt, flytande naturgass)
Auka satsing på hydrogen
Regjeringa vil styrkje satsinga på utvikling av
framtidas reine energisystem. I budsjettet for 2005 vert
Forskingsrådet sitt RENERGI-program styrka med 10 millionar til
totalt 94,4 millionar kroner. Satsinga er særleg retta mot
innovasjon innanfor energisektoren og utvikling av hydrogen som
energiberar. Offentleg stønad til hydrogenforsking får med dette
eit løft i høve til dagens forskingsinnsats som ligg på om lag 20
millionar kroner. I tillegg har Samferdselsdepartementet satt av
22,6 millionar kroner til forsøk med alternative drivstoff og
miljøvennleg teknologi.
Regjeringa vil kome attende til korleis ei satsing på hydrogen best kan følgjast opp, etter at Hydrogenutvalet si utgreiing har vore på høyring og høyringsfråsegnene er blitt vurdert.
Reforhandla avtale med Enova
Enova forvaltar midla frå Energifondet retta mot
energiomlegginga. Enovas oppdrag er spesifisert i ei avtale mellom
Olje- og energidepartementet og Enova.
Som ei oppfølging av stortingsmeldinga om forsyningstryggleiken for strøm har Olje- og energidepartementet og Enova SF reforhandla avtalen og auka måla for energiomlegginga. Enova skal etter reforhandlinga medverke til ny miljøvennleg energiproduksjon og -sparing tilsvarande 12 TWh per år innan utgangen av 2010. Dette er ei auke på 2 TWh per år samanlikna med den tidlegare avtalen, som blei inngått i 2002.
Regjeringa aukar ambisjonsnivået i energiomlegginga. Påslaget på nettariffen for uttak av kraft i distribusjonsnettet er frå 1. juli i år auka til 1,0 øre/kWh. Inntektene til Energifondet vert da på om lag 660 millionar kroner inklusive renteinntekter i 2005. Det er om lag 90 millionar kroner meir enn i 2004.