1 Hovudinnhaldet i proposisjonen

Arbeids- og inkluderingsdepartementet, i samråd med Barne- og familiedepartementet, legg i denne proposisjonen fram forslag om endringar i dei følgande lovene:

• Lov 28. februar 1997 nr. 19 om folketrygd

• Lov 12. februar 2010 nr. 4 om pensjonsordning for oppdragstaker i beredskapshjem eller spesialisert fosterhjem

• Lov 25. juni 2010 nr. 28 om avtalefestet pensjon for medlemmer av Statens pensjonskasse

Det blir foreslått å endre folketrygdlova § 7-3 slik at eigenandelen ved stønad til båretransport blir auka frå 10 til 20 prosent av full gravferdsstønad. Dette forslaget følger opp tiltak som er fremma i forslag til statsbudsjettet for 2027.

Som ei oppfølging av at fribeløpet for uføretrygda er auka til eitt grunnbeløp (1 G), blir det foreslått ei endring i folketrygdlova § 8-50 for å avgrense sjukepengegrunnlaget til mottakarar av uføretrygd til fastsett inntekt etter uførleik. Formålet er å gjere det meir attraktivt å få fastsett riktig uføregrad og å hindre at staten kompenserer inntektstap to gonger. Dette forslaget følger også opp tiltak som er fremma i forslag til statsbudsjettet for 2027. Forslaget får også verknad for ytingar etter folketrygdlova kapittel 9 og 14.

Det blir også foreslått ei endring i folketrygdlova § 9-5 som inneber at Arbeids- og velferdsetaten får ein klar heimel til å tidsavgrense vedtak om utvida rett til omsorgspengar dersom det ikkje er venta at vilkåra vil vere oppfylte til og med det kalenderåret barnet fyller 18 år. Føresegna om opplæringspengar i folketrygdlova § 9-14 blir også justert, slik at ordlyden svarer til praksis i Arbeids- og velferdsetaten i dag.

Dei andre forslaga gjeld rettingar, presiseringar og endringar av teknisk karakter.