Diskuterte flyktningkrisa med Merkel

Statsminister Erna Solberg besøkte onsdag Berlin, der ho deltok på eit G7-forum om kvinner, entreprenørskap og yrkesutdanning. Solberg møtte også forbundskanslar Angela Merkel til eit bilateralt møte, der flyktningkrisa stod i fokus.

– Merkel støtta det norske initiativet til ein givarlandskonferanse for Syria og nærområda, og me var einige om at me må få til eit fungerande system for å mottak av flyktningar som kjem til Europa, sa Solberg etter møtet.

Statsminister Erna Solberg i møte med forbundskanslar Angela Merkel i Berlin 16. september 2015.
Statsminister Erna Solberg i møte med forbundskanslar Angela Merkel i Berlin 16. september 2015. Foto: Gunnar Blöndal/Dagens Næringsliv

Statsministeren møtte også ekspertar frå Norges Røde Kors som no er i Tyskland for å hjelpa til med å ta imot flyktningar. I tillegg møtte ho den tyske finansministeren Wolfgang Schäuble. Den økonomiske utviklinga i Europa var eit viktig tema i møtet mellom Solberg og Schäuble.

– Tyskland er ein av våre aller viktigaste partnarar, og det er viktig med god kontakt med Tyskland i diskusjonane om korleis vi saman møter dei utfordringane Europa no står overfor, seier Solberg.