Gods på bane: Oppgang i containertrafikken i 2016

Tal frå NHO Logistikk og Transport viser at godstoga frakta 507 000 containerar i Noreg i 2016. Dette er 3,7 prosent meir enn i 2015, og det høgste talet på fire år. Oppgangen kom til tross for at NSB-eigde CargoNet, som er den største godstogoperatøren i Noreg, måtte innstille fleire tog som følgje av lokførarstreiken i NSB.

Fleire tiltak retta mot gods
I tillegg til satsinga på vedlikehald og fornying av jernbanenettet er fleire tiltak sette inn for styrkje godstransport på bane.

- I fjor fekk vi på plass ei kompensasjonsordning for godstogselskapa ved innstillingar som selskapa ikkje har skuld i. Vi har konkurranseutsett terminaldrifta på enkelte terminaler for å stimulere til meir effektiv drift. Effektiviseringa bidrar til å betre konkurransesituasjonen for jernbanetransport samanlikna med vegtransport. I 2017 vil òg kryssingsspor bli bygd for å auke kapasiteten for godstoga seier samferdselsministeren.  

I tillegg arbeider Bane NOR med å etablere beredskapsterminalar som skal gjere det mogleg å transportere gods på bane på delar av strekningane ved driftsavvik i infrastrukturen. Tiltaket legg til rette for at det i desse tilfella ikkje er naudsynt å frakte godset på  lastebil frå start til mål.    

For 2017 er det løyvd midlar til bygging av godsterminal på Heggstadmoen utanfor Trondheim. Det vil òg bli gjennomført tiltak for å betre driftsstabiliteten og driftseffektiviteten på Alnabruterminalen, som med plasseringa i Oslo er navet for kombitrafikken på jernbane i Noreg.

For fleire opplysingar – sjå:

• Nyheitsartikkel av 9.2.2017 m/volumutvikling for perioden 2001-2016 på nettsida til NHO Logistikk og Transport