7 Kven krav om erstatning skal rettast til

Straffeprosessloven § 449 første ledd regulerer saksbehandlinga for krav om erstatning etter strafforfølging. Kravet skal settast fram for det politidistriktet som etterforska saka. Politidistriktet sender kravet og straffesaksdokumenta til Statens sivilrettsforvaltning som behandlar kravet etter delegert myndigheit frå Justis- og beredskapsdepartementet. Statens sivilrettsforvaltning innhentar uttale frå påtalemakta ved behov.

Departementet føreslo i høyringsnotatet 4. juli 2025 punkt 6.5 å endre straffeprosessloven § 449 første ledd første og andre punktum slik at det går fram av lova at det er Statens sivilrettsforvaltning som behandlar krav om erstatning etter strafforfølging, og som krava skal framsettast for. Etter forslaget skal Statens sivilrettforvaltning innhente politidokumenta i saka, og kan be påtalemyndigheita uttale seg om kravet. Høyringsnotatet la særleg vekt på at forslaget ville verke effektiviserande og dessutan leggje til rette for meir brukarvennlege løysingar.

Alle høyringsinstansane som har uttalt seg, støttar forslaget om at erstatningskrav skal fremjast direkte til Statens sivilrettsforvaltning. Det gjeld Politidirektoratet, Nordland politidistrikt, Trøndelag politidistrikt, Statens sivilrettsforvaltning og Advokatforeningen.

Politidirektoratet peiker i høyringsfråsegna si på at etter deira kjennskap vert saker i dag som hovudregel vidaresende frå politiet til Statens sivilrettsforvaltning utan merknader. Det er ikkje eit sterkt generelt behov for at politiet skal ha moglegheit til å kommentere krava før dei vert mottekne av Statens sivilrettsforvaltning.

Nordland politidistrikt og Trøndelag politidistrikt viser til at det vil vere ressurssparande for distriktet om krava heretter skal sendast direkte til Statens sivilrettsforvaltning.

Advokatforeningen er òg positiv til forslaget, men peiker på viktigheita av utvikling av digitale løysingar for innsending av krav og oppfølging av saker.

Departementet føreslår at straffeprosessloven § 449 første ledd vert endra i tråd med forslaget i høyringsnotatet. Forslaget fekk brei støtte under høyringa. Eit krav om erstatning etter strafforfølging skal med dette rettast direkte til Statens sivilrettforvaltning, som innhentar politidokumenta i saka og ved behov ber om ei uttale frå påtalemakta.

Forslaget medfører auka brukarvenlegheit ved at erstatningssøkjaren berre må forhalde seg til eitt organ. Endringa legg vidare til rette for ei effektivisering ved at Statens sivilrettsforvaltning kan utvikle digitale løysingar.