Høringsbrev
Høringsbrev | | Helse- og omsorgsdepartementet
Høyring – Forslag til lov om endringar i pasientskadelova – dekking av advokatutgifter og forlengd søksmålsfrist
Helse- og omsorgsdepartementet sender med dette på høyring forslag til enkelte endringar i pasientskadelova. Høyringsnotatet kan lastast ned frå Helse- og omsorgsdepartementet si internettside.
Papirversjon av høyringsnotatet kan bestillast via e-post retta til elena.carreno@hod.dep.no eller på telefon 22 24 87 05.
Pasientskadelova tredde i kraft for den offentlege helsetenesta 1. januar 2003. Lova erstatta ei mellombels avtalebasert ordning med pasientskadeerstatning. Ho gir reglar om rett til erstatning for pasientar og andre som har lidd tap på grunn av ein pasientskade, når skaden kjem av svikt ved yting av helsehjelp. Norsk Pasientskadeerstatning (NPE) behandlar krav om erstatning. Pasientar kan klage på NPEs vedtak til Pasientskadenemnda.
Etter den gjeldande lova § 11 blir pasienten sine utgifter til advokathjelp dekte dersom den som greier ut saka, har gjort vedtak om det, eller utgiftene må reknast som tap som følgje av skaden. Føresegna gir pasienten rett til å få dekt nødvendige og rimelege utgifter til advokathjelp både i samband med behandlinga i NPE og i samband med ein eventuell klage over NPEs vedtak til Pasientskadenemnda.
Kostnadene NPE og nemnda har til å dekkje pasientane sine advokatutgifter, har auka mykje dei siste åra. Dette kjem både av at talet på erstatningskrav aukar, og at ein stadig større del av pasientane er representerte ved advokat.
I høyringsnotatet føreslår departementet at det blir opna for at utgiftene til advokathjelp blir reduserte noko, utan at dette går ut over pasientane. Etter forslaget kan det i forskrift givast nærmare føresegner om dekking av advokatutgifter, mellom anna reglar om at det skal brukast benefiserte satsar. Vidare føreslår departementet å regulere i
§ 11 at advokaten ikkje skal kunne krevje eller ta imot ytterlegare vederlag av pasienten utover det som blir dekt av NPE eller Pasientskadenemnda. Departementet sender også på høyring forslag til forskrift om dekking av advokatutgifter etter pasientskadelova. Av forskrifta § 1 følgjer at advokatutgifter skal bereknast ut frå ein sats tilsvarande salærsatsen som blir fastsett av Justisdepartementet med heimel i forskrift 3. desember 1997 nr. 1441 om salær fra det offentlige til advokater mv. (salærforskrifta) § 2. I forslaget til forskrift § 2 er det fastsett at berekninga etter § 1 skal skje på grunnlag av den salærsatsen som gjaldt då advokaten avslutta arbeidet med saka. I forslaget til § 3 blir det presisert at NPE og Pasientskadenemnda skal avgrense utgiftsdekninga til det timetalet som er rimeleg og nødvendig i saka.
Departementet vurderer det slik at bruk av den offentlege salærsatsen vil vere eit nødvendig verkemiddel for å betre kontrollen med kostnadene til dekking av pasientars utgifter til advokathjelp. Forslaga i høyringsnotatet inneber berre endringar når det gjeld den timesatsen advokaten kan krevje i samband med hjelp i pasientskadesaker som blir behandla av NPE eller Pasientskadenemnda. Forslaga fører ikkje til endringar i pasientane sin rett til å få dekt sakskostnadene sine. Den praksisen som har utvikla seg i NPE og Pasientskadenemnda når det gjeld i kva tilfelle pasienten har krav på å få dekt utgifter til advokathjelp, vil ikkje bli påverka av departementet sitt endringsforslag.
Etter pasientskadelova § 18 gjeld i dag ein fire månaders søksmålsfrist dersom pasienten ønskjer å bringe Pasientskadenemnda si avgjerd inn for domstolen. Departementet føreslår at fristen blir utvida til seks månader. Bakgrunnen for forslaget er at mange søksmål mot Pasientskadenemnda i dag blir trekte. Det er grunn til å tru at ei medverkande årsak til dette kan vere at søksmålsfristen er relativt kort. Unødige søksmål kostar både tid og ressursar.
Departementet ber om at høyringsfråsegner blir sende innan 19.01.2008 til:
Helse- og omsorgsdepartementet
Postboks 8011 Dep
0030 OSLO
Høyringsfråsegner kan òg sendast elektronisk innan same frist til: postmottak@hod.dep.no.
Med vennleg helsing
Lise Forfang e.f.
avdelingsdirektør
Marianne Skjellanger Lappi
seniorrådgivar