1 Innleiing
Utdannings- og forskingsdepartementet gjer med dette framlegg til endringar i lov 17. juli 1998 nr. 61 om grunnskolen og den vidaregåande opplæringa (opplæringslova).
Departementet gjer framlegg om at Rådet for fagopplæring i arbeidslivet og opplæringsråda blir nedlagde. For å vareta samarbeidet mellom departementet og partane i arbeidslivet om fag- og yrkesopplæringa tilrår departementet at det blir etablert alternative og meir fleksible møteplassar. Dette blir behandla i kapittel 2.
Vidare gjer departementet framlegg om å endre opplæringslova § 13-2 slik at når det blir gjort vedtak om plassering i institusjon etter barnevernlova § 8-4, vil det vere fylkeskommunen der den kommunen ligg som er ansvarleg for plasseringa, som også får ansvaret for å oppfylle opplæringsrettane etter opplæringslova. Bakgrunnen for forslaget er at lovteksten skal bli i samsvar med gjeldande ordning på området. Dette blir behandla i kapittel 3.
Departementet gjer også framlegg om ei presisering av opplæringslova § 13-3a, som i hovudsak gjeld presisering av gjeldande rett. Dette blir behandla i kapittel 4.