Nye reglar for hamnestyra
Historisk arkiv
Publisert under: Regjeringen Brundtland III
Utgjevar: Fiskeridepartementet
Pressemelding | Dato: 14.11.1995 | Sist oppdatert: 21.10.2006
P R E S S E M E L D I N G
Fiskeridepartementet
NR. 56/95, 14. november 1995
Nye reglar for hamnestyra
Fiskeridepartementet har no fastsett eigne reglar for myndigheit og samansetjing av styra for fem sentrale norske hamner. Både Staten, Forsvaret og dei sentrale brukarane, skal heretter vere sikra plass i hamnestyra i kommunane Bodø, Kristiansand, Oslo, Tromsø og Trondheim.
Den nye forskrifta frå Fiskeridepartementet har som mål å bidra til ei meir effektiv og konkurransedyktig hamneverksemd i kommunar der hamnene spelar ei stor og viktig rolle i heile det regionale samferdsletilbodet. Bakgrunnen for forskrifta er bortfallet av den tidlegare generelle regelen som påla kommunane å ha eigne styre for hamneverksemda. Etter at eigne hamnestyre ikkje lenger er obligatorisk i kommunane, finn departementet det no naudsynt å etablere ei særskild forvaltning og styring av viktige regionale hamner som dei i Bodø, Kristiansand, Oslo, Tromsø og Trondheim. Med ei slik særskild forvaltning vil styresmaktene sikre at desse kommunalt eigde hamnene betre skal kunne tene dei nasjonale hamne- og samferdsleinteressene.
I følgje forskrifta skal Staten ved Kystdirektoratet og Forsvaret stå for den formelle oppnemninga av sine representantar i hamnestyra i dei fem nemnde kommunane. Brukarane skal også vere sikre fast styreplass. Kommunane avgjer sjølve storleiken på styret og samansetjinga elles. Det nye forskriftet set også rammer for kva myndigheit hamnestyra skal ha.
Den nye forskrifta følgjer opp det arbeidet som
allereie er gjort for å tilpasse Hamne- og farvannslova til den nye
kommunelova. Ei kostnadseffektiv drift av hamnene er ein føresetnad
for Hamne- og farvatnslova. Lova legg prinsippet om kommunalt
sjølvstyre til grunn for styringa av hamnene, men styringa skal
også ta omsyn til at mange av hamnene er viktige ledd i det
landsomfattande transportsystemet.
Fiskeridepartementet har teke vare på desse føresetnadene og
omsyna i den nye forskrifta. Liknande forskrifter vil seinare bli
gjort gjeldande for dei interkommunale hamnene i Bergen og
Stavanger.
Kontaktperson: Underdirektør Kirsten Ullbæk Selvig, tlf. 22 34 64 37
Lagt inn 14 november 1995 av Statens forvaltningstjeneste, ODIN-redaksjonen