P R E S S E M E L D I N G
Kulturdepartementet

Pressemelding 18/96, 19.04.1996

Speleoverskot til idretten

Fordelinga av idrettens del av overskotet i Norsk Tipping A/S for 1995 på 594 mill. kroner vart fastsett i statsråd fredag. Dette er 26 mill. kroner meir enn i fjor. Saman med at det ikkje lenger vert sett av midlar til OL-anlegga på Lillehammer, gjev dette auka overføringar til idretten.

338,2 mill. kroner av midlane går til idrettsanlegg. Av dette går mesteparten, 270 mill. kroner (203,3 mill. kroner i 1995), til idrettsanlegg i kommunane og 8,5 mill. kroner (7,5 mill. kroner i 1995) til anlegg for friluftsliv i fjellet.

17,3 mill. kroner går til riksanlegg, samstundes som det er sett av 20 mill. kroner til framtidige nasjonalanlegg. 22,3 mill. kroner er sette av til spesielle anlegg. I dette inngår mellom anna 10,5 mill. kroner til idrettsanlegg på Svalbard, 3 mill. kroner til idrettshall ved Beitostølen Helsesportsenter og 6,3 mill. kroner til idrettsanlegg ved Universitetet i Oslo.

Til informasjon og utviklingsarbeid er det sett av 12,1 mill. kroner. Av dette får grupper med spesielle behov 3,2 mill. kroner, medan 1 mill. kroner er sette av til vidareutvikling av eit idrettsanleggsregister. I tillegg går mellom anna 1,8 mill. kroner til idrettsforsking, 2 mill. kroner til Hormonlaboratoriet ved Aker sykehus, 1,4 mill. kroner (1 mill. kroner i 1995) til Friluftslivets fellesorganisasjon og 6 mill. kroner (5 mill. kroner i 1995) til tiltak i dei største byane.

Norges Idrettsforbund får til saman 231,4 mill. kroner. Av dette beløpet utgjer rammetilskotet 195,9 mill. kroner og 15,8 mill. kroner er sette av til OL-deltaking i Nagano og Sydney. 19,6 mill. kroner er øyremerkte midlar. Av dette går 7,1 mill. kroner til anti-doping, 5,5 mill. kroner til barn og unge, 3 mill. kroner til kvinner, 1 mill. kroner til FoU-arbeid og 3 mill. kroner til utvikling av eit felles idretts- administrativt datasystem.