Arbeid, deltaking og helse blant tema på Dialogkonferansen 2015

Dette er andre året på rad at regjeringa arrangerer ei nasjonal dialogkonferanse. I år skal det vere åtte ulike parallellsesjonar der ulike tema skal diskuterast, og deltakarane kan gi innspel direkte til ansvarlege statsrådar og statssekretærar.

Seks statsrådar deltek

I tillegg til statsminister Erna Solberg (H), som skal opne konferansen, deltek barne-, likestillings- og inkluderingsminister Solveig Horne (FrP), kommunal- og moderniseringsminister Jan Tore Sanner (H), justis- og beredskapsminister Anders Anundsen (FrP), kulturminister Thorhild Widvey (H), næringsminister Monica Mæland (H) og arbeids- og sosialminister Robert Eriksson (FrP). Også kunnskapsdepartementet og helse- og omsorgsdepartementet er representert ved statssekretærane Birgitte Jordahl og Lisbeth Normann. Tema for dei parallelle sesjonane er:

• Arbeid
• Trygt samfunn
• Oppvekst og barnevern
• Kultur, frivilligheit og deltaking
• Entreprenørskap
• Bustad, nærmiljø, og deltaking
• Barnehage, skule og livslang læring
• Helse og livskvalitet

Panelsamtale

Under konferansen skal det også vere ein panelsamtale med temaet "deltaking og engasjement". Deltakarane her er journalist i TV2, Kadafi Zaman, jusstudent og bloggar, Fatima Almanea, lege og rådsmedlem i LIM, Tina Shagufta Kornmo og Saad Yusuf Hashi som har etablert Atlas kompetanse. Selda Ekiz, kjent som programleiar i NRK, er konferansier. For dei som ikkje deltek på konferansen, kan panelsamtalen følgast direkte på regjeringa.no. 

Sjekk Dialogkonferansens eigne nettsider for meir informasjon.