Pressemelding

Nr.: 97058
22.05.97

400.000 kroner for å granske valdsutviklinga i utsette barne- og ungdomsmiljø

Barne- og familiedepartementet løyver 400.000 kroner til ei gransking om valdsutviklinga i utsette barne- og ungdomsmiljø.

- Det hastar å gjere noko med livssituasjonen til barn og ungdom i einskilte oppvekstmiljø i Oslo, understreka barne- og familieminister Sylvia Brustad då ho åpna samrådsmøtet mot vald, mobbing, rus, kriminalitet og rasisme torsdag.

Representantar for 33 ungdomsorganisasjonar og -grupper er inviterte til torsdagens samrådsmøte med barne- og familieministeren. Samrådet går inn som ein del av arbeidet med Regjeringas utviklingsprogram for barn og unge.

- Saker om «Barneranarar», barn og ungdom som bruker våpen i gjengkonfliktar og eldre ungdom som rekrutterer barn og unge til kriminelle miljø er døme på unge i ein tøff livssituasjon. Vi må gjere noko så fort råd er med dette problemet, seier Sylvia Brustad.

Brustad peikar på at avsløringane den seinare tida viser at barn og unge i einskilte oppvekstmiljø i Oslo har ein livssituasjon som krev at det vert sett inn målretta tiltak.

- For å finne gode tiltak er det viktig å kjenne miljøet og vite kva barn og unge sjølve meiner om sin eigen situasjon. Difor vil vi finansiere eit forprosjekt som vil gi oss kunnskap om livssituasjonen deira, seier statsråden.

Sjølve granskinga vil fokusere på barn og ungdom sine normar, verdiar, haldningar og førebilete. Dei vil også verte spurde om eigen åtferd i forhold til valdsvideoar, våpen, rusmiddel, fysisk- og psykisk vald. I tillegg vil ein freiste finne svar på barn og ungdom sitt forhold til skule, utdanning, familie, fritida og framtidsdraumane deira.

Norsk Institutt for By og Regionforskning (NIBR) og Ungdom mot vold skal gjennomføre granskinga, som startar til hausten.

Vi minner om at samrådsmøtet pågår fram til kl. 15.30 torsdag og er åpent for pressen. Sted: Oslo Røde Kors Internasjonale Senter, Torggata 26 - 28.

linkdoc004005-070135#docProgram for møtet følger vedlagt.