Pressemelding

Nr. 044-97
30. mai

Reform 94 - lærlingstoda:

Framleis problematisk innan nokre fagområde

Det er pr. 1. mai 16 800 reform-elevar som søkjer læreplassar innan vidaregåande opplæring, viser ein oversikt Kyrkje-, utdannings- og forskingsdepartementet har henta inn frå fylkeskommunane. Dette er ein auke på om lag 700 søkjarar i høve til same tid i fjor. Det er inngått intensjonsavtalar, dvs. førebels avtalar om læreplass mellom bedrift og fylkeskommune, som vil kunne gi læreplass til om lag 12 200 av søkjarane på landsbasis. Dette er ein liten nedgang i høve til same tidspunkt i fjor. Sidan februar er det inngått i underkant av 4000 nye avtalar.

Også i år ser det ut til å bli mangel på lærlingplassar innan særskilte fag. Oversikten viser at skilnaden på inngåtte intensjonsavtalar og søkjarar er størst innan omsorgsfag (mangel på 433 plassar), barne- og ungdomsarbeidarfaget (605), kokkfaget (448), elektrikarfaget (632) og bilfaget, lette køyrety (435). Også i fjor var det mangel på lærlingplassar innan desse fagområda som utgjorde til saman nesten halvparten av den samla mangelen på læreplassar.

På andre fagområde ser det ut til at det blir for få lærlingar. Dette vil m.a. gjelde kontorfaget, byggfag, platearbeidar/sveisfaget og reinhaldsoperatørfaget. Til saman gjeld dette i underkant av 2000 læreplassar.

-Oversikten viser at mange bedrifter har tatt eit tak for å få til ei akseptabel lærlingordning, seier kyrkje-, utdannings- og forskingsminister Reidar Sandal i ein kommentar. -Det er likevel grunn til å understreke at bransjane innanfor dei områda der det er størst mangel på læreplassar, må strekke seg endå lenger for å skaffe nok plassar til alle søkjarane. Dersom bransjane ønskjer ein godt kvalifisert arbeidsstokk i framtida må dei og ta ansvaret ved å utdanne ungdommen no. Eg føreset at bransjane utnyttar dei vel 250 millionar kronene i stimuleringstiltak som er stilt til rådvelde i 1997 for å skaffe fleire læreplassar. Departementet vil følgje tett opp utviklinga når det gjeld å skaffe læreplassar, og vil ha jamnleg kontakt med partane i arbeideidslivet, Kommunenes Sentralforbund og fylkeskommunane, seier Sandal.

Kontakt:

Ekspedisjonssjef Ole Briseid, tlf. 22 24 76 00
Avdelingsdirektør Jan Ellertsen, tlf. 22 24 75 30