Pressemelding

Nr. 045-97
27. mai 1997

Sandal møter AOF til samråd i Haugesund

Kyrkje-, utdannings- og forskingsminister Reidar Sandal møter i dag lokallaga i Arbeidernes Opplysningsforbund (AOF) til samråd. Samrådet er første dag av AOF sin landskonferanse i Haugesund. Statsråden møter over 80 representantar for 55 av AOF sine lokallag. Temaet for samrådet er den varsla vaksenopplæringsreforma.

I sitt innlegg vil statsråd Sandal leggje vekt på at det no er dei vaksne sin tur når det gjeld opplæring. Satsinga på livslang læring er grunngitt både ut frå, samfunnet og arbeidslivet sine behov. Dei frivillige organisasjonane som utgjer grunnlaget i studieforbunda har brei røynsle med å motivere og rekruttere vaksne til opplæring. Dette er kvalitetar som den komande reforma må ta vare på.

Statsråden legg vidare vekt på at AOF har særskilte føresetnader for å ta vare på arbeidstakarane sine behov i etter- og vidareutdanninga. AOF gjer ein stor innsats for å leggje til rette opplæring for at vaksne med røynsle frå yrkeslivet kan ta fagbrev, vert særskilt trekt fram av statsråden.

Regjeringa oppnemnte hausten 96 eit offentleg utval (Buer-utvalet) som skal vurdere etter- og vidareutdanning. M.a. skal utvalet vurdere spørsmål knytta opp mot lovfesta rett til etter- og vidareutdanning. Det er venta at utvalet legg fram si innstilling i førstninga av oktober.

Internett: linkdoc014005-090066#dochttp://odin.dep.no/kuf/taler/97/970527.html