Pressemelding

Nr. 032-97
2. mai 1997

Stortingsmelding om lærarutdanning med framlegg om

Ny modell for yrkesfaglærarutdanning

• Ny modell for yrkesfaglærarutdanning
• Ny studiemodell for allmennlærarutdanninga
• Felles rammeplan for praktisk-pedagogisk utdanning
• Færre faglærarutdanningar
• Eiga utgreiing om samisk lærarutdanning
• Oppheving av lærarutdanningslova
• Faglærarar, lærarar med praktisk-pedagogisk utdanning og yrkesfaglærarar kan tilsetjast på mellom- og ungdomssteget
• Rammeplanar skal gi tydelegare og klarare styringssignal
• Vurdering av om studentane er skikka til å vere lærarar skal skje gjennom heile studiet
• Satsing på informasjonsteknologi og realfag i lærarutdanninga
• Vaksenpedagogikk i all lærarutdanning

Dette er hovudpunkta i linkdoc014005-040008#docStortingsmelding nr. 48 (1996-97) Om lærarutdanning som passerte Statsråd fredag. Stortingsmeldinga byggjer på lærarutdanningsutvalet si innstilling, linkdoc014005-020005#docNOU 1996: 22 Lærerutdanning, Mellom krav og ideal, og dei omfattande høyringane som blei gitt til innstillinga.

Dei omfattande reformene i skule og opplæring (Reform 94 og Reform 97) og nye krav frå samfunns- og arbeidsliv har gjort det nødvendig å gjennomgå innhald og organisering av lærarutdanninga.

Meldinga omfattar allmennlærarutdanning, førskulelærarutdanning, praktisk-pedagogisk utdanning, faglærarutdanning og yrkesfaglærarutdanning.

Omforminga av lærarutdanninga har som mål

• å ta vare på og utvikle vidare prinsippet om einskapsskulen og eit likeverdig opplæringstilbod
• å tilpasse utdanninga til noverande opplæringssystem og dei læreplanar som gjeld
• å tilpasse utdanninga til dei endringar som skjer i samfunnet og gjere lærarane i stand til å møte nye utfordringar i framtidig opplæring i grunnskulen, vidaregåande opplæring og vaksenopplæring
• å gi eit godt grunnlag for medverknad til vidare utvikling av opplæringssystemet.
• å styrkje lærarane sin faglege, fagdidaktiske og pedagogiske kompetanse

Ny modell for yrkesfaglærarutdanninga

Det blir innført ei ny 3-årig yrkesfaglærarutdanning, dels ved å gjere om eksisterande faglærarutdanningar, dels ved å utnytte kapasitet og kompetanse i relevante miljø i ingeniørutdanninga. Den nye modellen skal byggje på alle yrkesfaglege studieretningar i vidaregåande opplæring. Innføringa skjer i to fasar:

• oppretting av fem yrkesfagretningar frå år 2000, som er første året Reform 94-elevar vil kunne vere kvalifiserte for opptak og
• vidare utbygging av dei neste seks studieretningane innan år 2006.

Opptakskrav skal vere fag-/sveinebrev eller anna 3-årig fullført yrkesutdanning, 2 års relevant praksis og generell studiekompetanse.

Allmennlærarutdanninga

Allmennlærarutdanninga skal kvalifisere for undervisning på alle trinn i grunnskulen og for vaksenopplæring i grunnskulefaga. Den obligatoriske delen blir utvida. Engelsk går inn som obligatorisk fag. Omfanget av matematikk blir utvida, og det blir obligatorisk med eit praktisk og eit estetisk fag. Dessutan blir det ein fellesmodell dei tre første åra.

I den valfrie delen det fjerde året kan studentane velje anten to einingar på 10 vekttal, der den eine er "styrt val", eller ei årseining (20 vekttal) i eitt fag. Kva for fag som skal inngå i "styrt val", vil bli fastsett for 3-årsperiodar, avhengig av vurderingar av behovet i skulen. For første periode skal det "styrte valet" vere i matematikk eller naturfag.

Praktisk-pedagogisk utdanning

Praktisk-pedagogisk utdanning for allmennfag og yrkesfag blir organisert i ein felles rammeplan. Dessutan er det nødvendig å evaluere organiseringa av den eittårige praktisk-pedagogiske utdanninga ved universiteta.

Faglærarutdanninga

Ordninga med eigne rammeplanar for faglærarutdanning i kroppsøving, faglærarutdanning i naturfag med matematikk og faglærarutdanning for økonomisk-administrative fag blir avvikla. Den noverande faglærarutdanninga i ernæring, helse og miljøfag blir endra til yrkesfaglærarutdanning basert på søkjarar med fagbrev, yrkespraksis og generell studiekompetanse. Det blir to faglærarutdanningar styrt av rammeplanar. Det gjeld musikk, dans og drama og formgiving, kunst og handverk.

Samisk lærarutdanning

Det er viktig å styrkje rekrutteringa til samisk lærarutdanning, og det vil bli tatt initiativ til ei eiga utgreiing om den.

Fellestiltak for all lærarutdanning

Det blir foreslått at lærarutdanningslova blir oppheva, og at innhaldet i lærarutdanninga blir fastsett i rammeplanar i medhald av universitets- og høgskulelova.

Regjeringa foreslår at heimelen til å fastsetje nasjonale standardkrav for undervisningskompetanse blir lovfesta, og at utdanningskrav for undervisningspersonale i grunnskule, vidaregåande opplæring og vaksenopplæring blir nærmare fastsette i forskrift.

Regjeringa foreslår at faglærarar, lærarar med praktisk-pedagogisk utdanning og yrkesfaglærarar som er utdanna etter den nye modellen for yrkesfaglærararutdanning skal kunne undervise på mellom- og ungdomssteget i grunnskulen i fag som dei har relevant kompetanse i.

Vurderinga av om studentane i lærarutdanninga er skikka til å vere lærarar skal skje gjennom heile studiet. Dette skal dokumenterast gjennom utført praksis og anna fagleg arbeid. Det vil bli utarbeidd felles kriterium for slik vurdering som ein del av rammeplanane.

Rammeplanane skal gi tydelegare og klarare styringssignal, og det vil bli sett i verk tiltak som kan betre grunnlaget for å vurdere om opplæringa i lærarutdanninga er i samsvar med rammeplanane.

Regjeringa forslår auka satsing på realfag og informasjonsteknologi. Det vil særleg vere viktig å motivere jenter til å satse på desse faga.

Det blir foreslått at vaksenpedagogikk inngår i pedagogisk teori i all grunnutdanning for lærarar.

Det vil bli tatt initiativ til eit avgrensa prøveprosjekt med rettleiing av nyutdanna lærarkandidatar.

Departementet vil foreslå at det blir utvikla ein eigen studieplan for døve.

Det blir foreslått at studentar med innvandrarbakgrunn som er fritatt frå eksamen i sidemål i vidaregåande opplæring, kan få fritak frå kravet om eksamen i begge målformer i allmennlærarutdanninga.

St.meld nr. 48 (1996-97) Om læararutdanning er lagt ut på internett med denne adressa:

http://odin.dep.no/repub/96-97/stmld/48/

Pressekontakt: Avdelingsdirektør Borghild Abusland, tlf. a 22 24 77 20